சிதம்பரத்தில் பூட்டியிருந்த வீடு தீப்பிடித்து ரூ.5 லட்சம் பொருள்கள் சேதம்

சிதம்பரத்தில் செவ்வாய்க்கிழமை நள்ளிரவு பூட்டியிருந்து வீடு திடீரென தீப்பிடித்து முற்றிலும் எரிந்து சேதமுற்றது. வீட்டிலிருந்த ரூ.5 லட்சம் மதிப்புள்ள மோட்டார் சைக்கிள் மற்றும் வீட்டு உபயோகப் பொருள்கள், சான்றிதழ்கள் உள்ளிட்டவை எரிந்து சேதமுற்றன.

சிதம்பரம் நேதாஜிதெருவில் வசிப்பவர் பார்த்தீபன். இவர் வீட்டை பூட்டிக் கொண்டு குடும்பத்தினருடன் வெளியூர் சென்றிருந்தார். இந்நிலையில் செவ்வாய்க்கிழமை நள்ளிரவு வீடு திடீரென தீப்பற்றி எரிந்தது. அருகாமையிலிருந்தவர்கள் உடனடியாக தீயணைப்புத் துறையினருக்கு தகவல் தெரிவித்தனர். நிலைய அலுவலர் ஜகாங்கீர்மமுகமது தலைமையில் தீயணைப்பு மீட்புத்துறையினர் 2 வாகனங்களில் விரைந்து சென்று தீ மேலும் பரவாமல் தடுத்து அணைத்தனர். தீ விபத்தில் மோட்டார் சைக்கிள் மற்றும் வீட்டு உபயோகப் பொருள்கள், பள்ளி சான்றிதழ்கள், புத்தகங்கள் அனைத்தும் எரிந்து சேதமுற்றன. தீவிபத்து குறித்து நகர போலீஸார் விசாரணை மேற்கொண்டுள்ளனர்.