சிதம்பரம் ஸ்ரீநடராஜர் கோயிலில் மார்கழி ஆருத்ரா தரிசன உத்சவம்: நாளை கொடியேற்றம்!

சிதம்பரம் ஸ்ரீநடராஜர் கோயிலில் ஸ்ரீசிவகாமசுந்தரி சமேத ஸ்ரீமந் நடராஜ மூர்த்தியின் மார்கழி ஆருத்ரா தரிசன உத்சவம் நாளை சனிக்கிழமை கொடியேற்றத்துடன் தொடங்குகிறது.

சித்சபை எதிரே உள்ள கொடிமரத்தில், நாளை சனிக்கிழமை காலை 8 மணிக்கு மேல் 9 மணிக்குள் உற்சவ ஆச்சாரியார் ச.நடராஜ சுப்ரமணிய தீட்சிசர் கொடியேற்றி வைக்கிறார். தொடர்ந்து 10 நாட்கள் பஞ்சமூர்த்தி வீதிஉலாவுடன் உற்சவம் நடைபெறுகிறது. திருவிழா 10 நாட்களும் சாயரட்சை பூஜையில் சித்சபையில் மாணிக்கவாசகப் பெருமான் எழுந்தருளிச்செய்து திருவெம்பாவை உத்சவம் நடைபெறுகிறது.

ஜன.4-ம் தேதி (ஞாயிற்றுக்கிழமை) தேர்த்திருவிழாவும், இரவு 8 மணிக்கு ஆயிரங்கால் முன் முகப்பு மண்டபத்தில் ஏககால லட்சார்ச்சனை நடைபெறுகிறது. ஜன.5-ம் தேதி திங்கள்கிழமை அதிகாலை சூரிய உதயத்திற்கு முன்பு காலை 4 மணி முதல் 6 ணி வரை ஸ்ரீசிவகாமசுந்தரி சமேத ஸ்ரீமந் நடராஜமூர்த்திக்கு மகாபிஷேகம் நடைபெறுகிறது. பின்னர் காலை 10 மணிக்கு சித்சபையில் ரகசியபூஜையும், பஞ்சமூர்த்தி வீதிஉலா வந்த பின்னர் பிற்பகல் 2 மணிக்கு மேல் மார்கழி ஆருத்ரா தரிசனமும், ஞானகாச சித்சபா பிரவேசமும்

நடைபெறுகிறது. ஜன.6-ம் தேதி செவ்வாய்க்கிழமை பஞ்சமூர்த்தி முத்துப்பல்லக்கு வீதிஉலாவுடன் உற்சவம் முடிவடைகிறது. உத்சவ ஏற்பாடுகளை கோயில்

பொதுதீட்சிதர்களின் செயலாளர் ஆர்.பாஸ்கர தீட்சிதர், துணைச் செயலாளர் என்.எஸ்.மணி தீட்சிதர் உள்ளிட்டோர் செய்துள்ளனர்.