சிதம்பரத்தில் உமாபதிசிவம் திருநட்சத்திர குருபூஜை விழா

சிதம்பரம் கொற்றவன்குடிதோப்பில் அமைந்துள்ள மடலாயத்தில் உமாபதிசிவாச்சாரியார் சுவாமிகளின் திருநட்சத்திர குருபூஜை விழா ஞாயிற்றுக்கிழமை வெகுசிறப்பாக நடைபெற்றது.

சிதம்பரம் நடராஜர் கோயிலில் தரிசன திருவிழாவிற்காக முதல்நாள் கொடியேற்றுவது வழக்கம். கிபி 1310-ல் ஒருமுறை மார்கழி திருவிழாவின் போது கொடியேற்றம் அன்று தில்லைவாழ் அந்தனரான உமாபதி சிவாச்சாரியார் தனது குருவான மறைஞான சம்பந்தரின் சேடப்பிரசாதத்தை ஏற்றுக் கொண்டதால் அவரை திருக்கோயில் முறையிலிருந்து நீக்கிவிட்டனர். இதனால் தீட்சிதர்கள் வேறு ஒருவரை கொண்டு கொடியேற்ற முற்பட்டனர். ஆனால் கொடி ஏறவில்லை. அப்போது "யாம் இங்கில்லை, உமாபதி பூசை பெட்டகத்தில் இருக்கின்றோம்" என அசரிரீ கேட்டது. உடனே அனைவரும் கொற்றவன்குடி உமாபதிசிவம் மடத்திற்கு சென்று அவரிடம் நடந்தவற்றை கூறி உமாபதிசிவத்தை பூசை பெட்டகத்துடன் பல்லக்கில் அழைத்து வந்து கோயிலில் எழுந்தருளியனர். அங்கு உமாபதிசிவம் நடராஜப் பெருமானை வழிபட்டு கொடிமரத்தின் அருகே நின்று கொடிகவி பாடியபோது கொடி தானாக ஏறியதாக வரலாறு கூறுகிறது.

சிறப்புவாய்ந்த உமாபதிசிவாச்சாரியாரின் திருநட்சத்திர குருபூஜை விழா ஞாயிற்றுக்கிழமை நடைபெற்றது. உமாபதிசிவம் மடாலயத்தில் உமாபதி சிவாச்சாரியார் சுவாமிகளுக்கு 108ல சங்குபூஜை, மகாபிஷேகம், சங்காபிஷேகம், திருமுறை விண்ணப்பம், திருமுறை முற்றோதல்,  மகா தீபாராதனை, மகேஸ்வரபூஜை ஆகியவை வெகுசிறப்பாக நடைபெற்றது. திரளான சிவனடியார்கள் பங்கேற்று தரிசித்தனர். 

சிதம்பரம் மெளனமடாலய மடாதிபதி ஸ்ரீசுந்தரமூர்த்திசுவாமிகள் தலைமை வகித்து ஆசி வழங்கினார். திருமுதுகுன்றம் முனைவர் சு.தங்கராசு, அண்ணாமலைப் பல்கலை. நூலகர் ஆறு.வீரப்பனார், குருஞானன சம்பந்தர் நற்பணி மன்றத் தலைவர் கு.சேதுசுப்பிரமணியன், ஏ.பி.ஆர்.சரவணன், ஆர்.பாலசுப்பிரமணிய ஓதுவார், அர்ச்சகர் அ.நடராஜன் உள்ளிட்டோர் பங்கேற்று கருத்துரையாற்றினர்.  மதியம் சிவனடியார்களுக்கு அன்னதானம் வழங்கப்பட்டது.