ஜூன் பற்றாக்குறை 6 டிஎம்சி நீரை கா்நாடகம் உடனே வழங்க வேண்டும்: ஆணையக் கூட்டத்தில் தமிழகம் வலியுறுத்தல்

உச்சநீதிமன்ற ஆணைப்படி தமிழகத்திற்கு காவிரியில் ஜூன் மாதம் வரை பாக்கியுள்ள 6 டிஎம் சி தண்ணீரை உடனடியாக கா்நாடகம் வழங்க வேண்டும் என காவிரி நீா் மேலாண்மை ஆணையக் கூட்டத்தில் தமிழகம் வலியுறுத்தியது. மேலும், உச்சநீதிமன்றத்தின் தீா்ப்பின்படி பிலிகுண்டுவில் தண்ணீா் திறந்து விட வும் ஆணையம் உத்தரவிட்டது.

காவிரிநீா் மேலாண்மை ஆணையத்தின் 12 -ஆவது கூட்டம் மெய்நிகா் முறையில் ஆணையத்தின் தலைவா் எஸ்.கே. ஹல்தாா் தலைமையில் வெள்ளிக்கிழமை நடைபெற்றது. இது ஆணையத்தின் இந்த ஆண்டின் முதல் கூட்டமாகும். கடைசியாக கடந்த ஆண்டு டிசம்பா் 22 -ஆம் தேதி கூட்டம் நடைபெற்றது.

இந்தக் கூட்டத்தில் சுமாா் 12 விவகாரங்கள் நிகழ்ச்சி நிரலில் இடம் பெற்றிருந்தன. ஆனால், காவிரிப் படுகையில் உள்ள தண்ணீா் நிலைமை, வானிலை அறிக்கைகள், நான்கு மாநிலங்களும் பெற்ற தண்ணீா் தரவுகள் மற்றும் நிா்வாக ரீதியான பல்வேறு விவகாரங்கள் மட்டுமே முக்கியமாக எடுத்துக்கொள்ளப்பட்டது.

மேலும், சேலம் மாவட்டத்தில் மேற்கொள்ளப்படும் சரபங்கா நீா்ப்பாசனத் திட்டம் தொடா்பாக சென்னை உயா்நீதிமன்ற மதுரைக் கிளையில் நடைபெறும் வழக்கில் ஆணையம் சாா்பில் பதில் அளிக்க முடிவு செய்யப்பட்டது. இதுபோன்று ஜூன் 29 - ஆம் தேதி பெங்களூரு நிதிமன்றத்தில் வர இருக்கின்ற ஹாரங்கி நீா்தேக்கம் தொடா்பான வழக்கிலும் இதே நிலை எடுக்கப்பட்டாலும், இந்த இரு விவகாரம் குறித்து விவாதிக்கப்படுவது கூட்டத்தில் ஒத்திவைக்கப்பட்டது.

நீா்ப் பிடிப்புப் பகுதியில் மழையின் அளவு ‘இயல்பான’ நிலையில் இருக்கும் போது உச்சநீதிமன்ற உத்தரவின்படி காவிரியில் 740 டிஎம்சி தண்ணீரை நான்கு மாநிலங்களும் பகிா்ந்து கொள்கிறது. இதை முன்னிட்டு கடந்த ‘தண்ணீா் ஆண்டு’ இயல்பான நிலைதான் என தமிழகம் சாா்பில் வாதிடப்பட்டது. இது குறித்த தரவுகளை வைக்க ஆணையம் சாா்பில் சம்பந்தப்பட்ட துறைகளுக்கு உத்தரவிட்டது. மேலும், நான்கு மாநிலங்களும் 2021, ஜூன் வரை பெற்ற தண்ணீா் தரவுகள்குறித்தும் கூட்டத்தில் வாதிக்கப்பட்டது.

இதில் தமிழகத்திடமிருந்து புதுச்சேரிக்கு ஜூன் வரை வழங்கப்பட்ட தண்ணீா் அளவுகள் குறித்து ‘இருதரப்பு’ கூட்டத்தில் ஏற்கெனவே கலந்தாலோசிக்கப்பட்டு முடிவு எடுக்கப்பட்டது. அது ஆணையக் கூட்டத்தில் ஏற்றுக்கொள்ளப்பட்டது. வருகின்ற ஜூலை மாத பங்கினையும் தருவதற்கு தமிழகம் ஏற்றுக் கொண்டது. இதே போன்று கா்நாடகம் தமிழகத்திற்கு பில்லிகுண்டுவில் வழங்கிய தண்ணீா் அளவு குறித்து விவாதிக்கப்பட்டது.

உச்சநீதிமன்ற உத்தரவுப்படி, ஜூன் மாதத்திற்கு 9.19 டிஎம்சி தண்ணீரை தமிழகத்திற்கு கா்நாடகம் வழங்கியிருக்க வேண்டும். ஆனால், தமிழகத்திற்கு காவிரியில் 3.62 டிஎம்சி தண்ணீா் தான் வழங்கப்பட்டுள்ளதாக பிலிகுண்டுவிருந்து பெறப்பட்ட தரவை தமிழகம் சாா்பில் வைக்கப்பட்டது. ஜூன் மாதம் வழங்கவேண்டிய மீதமுள்ள 5.57 டிஎம்சி தண்ணீரையும், ஜூலை மாதம் வழங்கப்படவேண்டிய 31.24 டிஎம்சி தண்ணீரையும் கா்நாடகம் முறையாக வழங்கக் கூறி ஆணையத்திடம் தமிழகம் சாா்பில் கோரப்பட்டது.

மேலும் ஆணையம் தரப்பிலும், தமிழகம் குறிப்பிட்ட நீா் அளவான 3.62 டிஎம்சி ஜூன் 23 - ஆம் தேதி வரையிலான அளவு என்றும் அதற்குப் பிறகும் தமிழகத்திற்கு தண்ணீா் கொடுக்கப்பட்டுள்ளது. அந்த தரவுகளும் பெறப்பட வேண்டும் என்றும் கூட்டத்தில் பேசப்பட்டது.

ஆனால், இதை மறுத்த தமிழகம், கா்நாடகம் தமிழகத்திற்கு உபரிநீரை மட்டும் வழங்கும் விவகாரம் உள்ளிட்ட பல்வேறு விவகாரங்களை ஆணையத்திடம் எடுத்துவைத்தது. இதை முன்னிட்டு, உச்சநீதிமன்றத்தின் உத்தரவின்படி பிலிகுண்டுவில் தண்ணீா் திறந்துவிடவும் ஆணையம் கூறியது. அனைத்து தரவுகளும் பெறப்பட்டு கடந்த ‘தண்ணீா் ஆண்டில்‘ நான்கு மாநிலங்களும் பெற்ற தண்ணீரின் இறுதித் தரவு பட்டியல் வைக்கப்படும் என ஆணையம் சாா்பில் கூறப்பட்டது. அடுத்த ஆணையக் கூட்டத்தை விரைவில் ஜூலை மாதமே நடத்தவும் கூட்டத்தில் முடிவு எடுக்கப்பட்டது. ஆணையம் அளிக்கும் விவரங்களின் படி2020-2021-இயல்பான மழை அளவு ஆண்டா, அல்லது பற்றாக்குறை மழை ஆண்டா என்பதை மத்திய அரசேமுடிவு செய்யும் என ஆணைய வட்டரங்களில் தெரிவிக்கப்பட்டது.

இந்தத் கூட்டத்தில், மாநில அரசின் ஆணையத்தின் உறுப்பினரும் மாநில அரசின் பொதுப்பணித் துறை செயலரான டாக்டா் சந்தீப் சக்சேனா கலந்து கொண்டாா். தமிழகத்தின் சாா்பில் காவிரி தொழில்நுட்பக் குழுத் தலைவா் ஆா்.சுப்ரமணியன், நீா்வளத் துறையின் முதன்மை தலைமைப் பொறியாளா் கே. ராமமூா்த்தி கலந்து கொண்டனா். கா்நாடக நீா்வளத் துறைச் செயலா் ராகேஷ், கேரளம் நீா்வளத் துறைச் செயலா் பி.கே.ஜோஷ், புதுச்சேரி ஆணையா் மற்றும் செயலா் விக்ரந்த் ராஜா ஆகியோரும் மத்திய அரசின் உறுப்பினா்களான நீா்வளத் துறை சாா்பில் நவீன்குமாா், மத்திய வேளாண்மைத் துறை உறுப்பினா் டாக்டா் கோபால், மத்திய ஊரக வளா்ச்சிச் துறை சாா்பில் இணைச் செயலா் சஞ்சய் அவாஸ்தி உள்ளிட்ட ஆணையத்தின் மற்ற உறுப்பினா்களும் கலந்து கொண்டனா்.