தினமும் நடைப்பயிற்சி மேற்கொள்வது மட்டுமே உடல் எடை குறைப்புக்கு உதவாது என்று ஆய்வு ஒன்றில் தெரிய வந்துள்ளது. 

பிரிகாம் யங் பல்கலைக்கழகத்தின்(BYU) புதிய ஆய்வின்படி, தினமும் வெறுமனே நடப்பது, சராசரியாக நாள் ஒன்றுக்கு 10,000 அடிகள் எடுத்து வைப்பது உடல் எடையை குறைக்க ஒருபோதும் பயன்படாது என்று தெரிவிக்கப்பட்டுள்ளது. 

இந்த ஆய்வில் சுமார் 120க்கும் மேற்பட்ட மாணவர்கள் பங்கேற்றனர். மாணவர்கள் மூன்று குழுக்களாகப் பிரிக்கப்பட்டு, 10,000 முதல் 15,000 அடிகள் வரை, ஆறு மாதங்களுக்கு தொடர்ந்து நடக்குமாறு அறிவுறுத்தப்பட்டனர். ஆய்வு தொடக்கத்திலும், ஆறு மாதங்களுக்குப் பின்னர் ஆய்வின் முடிவிலும் மாணவர்களின் எடை கணக்கிடப்பட்டு ஒப்பீடு செய்யப்பட்டது. 

இதில், மாணவர்கள் உடல் எடையில் குறிப்பிடத்தக்க அளவு மாற்றம் ஏற்படவில்லை என்பதனை ஆராய்ச்சியாளர்கள் கண்டுபிடித்தனர். 

நடைப்பயிற்சி மட்டுமே உடல் எடையை குறைக்காது. தற்போதைய உடல் செயல்பாட்டை சீராக்க அல்லது உடல் எடையை சீராக வைத்துக்கொள்ள வேண்டுமானால் நடைப்பயிற்சி பயன்படலாம்.

மாறாக, நடைப்பயிற்சி மட்டும் உடல் எடையை குறைக்க உதவாது. ஆனால், உட்கார்ந்தே இருப்பதைவிட நடப்பது மேலும் நமது உடல் எடை அதிகரிக்காமல் கட்டுப்படுத்தும் என்று கூறுகிறார் உடற்பயிற்சி அறிவியல் துறையின்  பேராசிரியர் புரூஸ் பெய்லி. 

எனவே, உடல் எடையை குறைக்க நடைப்பயிற்சி மட்டுமின்றி, உணவு கட்டுப்பாடுகளுடன் தேவையான இதர உடற்பயிற்சிகளையும் செய்வது அவசியமானது என்று அறிவுறுத்தப்படுகிறது.