சுகாதாரத் துறைச் செயலாளா் மீது கடும் நடவடிக்கை எடுங்கள்!: மத்திய உள்துறை செயலாருக்கு அமைச்சா் செளரவ் பரத்வாஜ் கடிதம்

நமது நிருபா்

புது தில்லி: தில்லி குழந்தைகள்நல மருத்துவமனையில் தீ விபத்து ஏற்பட்ட விவகாரத்தில் சுகாதாரத் துறை செயலாளா் தீபக் குமாா் மீது கடுமையான நடவடிக்கை எடுக்கக் கோரி மத்திய உள்துறை செயலாளருக்கு அமைச்சா் செளரவ் பரத்வாஜ் செவ்வாய்க்கிழமை கடிதம் எழுதியுள்ளாா்.

இது தொடா்பாக அவா் எழுதியுள்ள கடிதத்தில் கூறியிருப்பதாவது:

கடந்த சனிக்கிழமை இரவு தில்லி விவேக் விஹாரில் உள்ள குழந்தைகள் நல மருத்துவமனையில் ஏற்பட்ட தீ விபத்தில், 7 பச்சிளம் குழந்தைகள் இறந்த செய்தியை நீங்கள் அறிந்திருப்பீா்கள். நானும் இந்தச் செய்தியை ஊடகங்கள் மூலமே மறுநாள் காலை அறிந்து கொண்டேன். பின்னா், சுகாதாரத் துறை செயலாளா் தீபக் குமாருக்கு பல முறை போன் செய்தேன். அவா் என் அழைப்பை எடுக்கவில்லை. ‘வாட்ஸ் அப்’பிலும் செய்தி அனுப்பினேன். அவா் தரப்பில் இருந்து எந்தப் பதிலும் வராததால், சம்பவ இடத்திற்கு நான் நேரடியாகச் சென்று பாா்வையிட்டேன். தில்லியில் இவ்வளவு பெரிய விபத்து நடந்ததை ஒரு சுகாதாரத் துறை அமைச்சருக்கு ஊடகங்கள் தெரிவித்தது எனக்கு ஆச்சரியமாக இருந்தது.

இந்தத் தகவலை நான் சுகாதாரத் துறையின் செயலாளா் மூலம் பெறாதது மிகவும் வெட்கக்கேடானது. அவரைத் தொடா்பு கொள்ள முடியாத நிலையில், தீ விபத்து சம்பவத்தில் உடனடியாக எடுக்க வேண்டிய நடவடிக்கைகளின் வழிமுறைகளை குறிப்பாக அனுப்பினேன். ஆனால், அவா் அந்தக் குறிப்பை ஏற்க மறுத்துவிட்டாா். இந்தச் சம்பவம் தொடா்பாக சுகாதாரச் செயலாளரோ அல்லது துறை அதிகாரிகளோ எனக்கு எந்தத் தகவலும் தெரிவிக்காததால், நாள் முழுவதும் ஊடகவியலாளா்களின் பல்வேறு கேள்விகளுக்கு என்னால் பதிலளிக்க முடியவில்லை.

கடந்த திங்கள்கிழமை இந்த தீ விபத்து சம்பவம் தொடா்பாக விவாதிக்க துறை அதிகாரிகளின் கூட்டத்திற்கு அழைப்பு விடுத்தேன். ஆனால், அந்தச் சந்திப்பிலும் சுகாதாரத் துறை செயலாளா் பங்கேற்கவில்லை. இதுகுறித்து தனிச் செயலாளரிடம் கேட்டபோது, சுகாதாரத் துறை செயலா் விடுப்பில் இருப்பதாகக் கூறினாா். சுகாதாரத் துறையின் அமைச்சராக இருந்தும், துறையின் செயலாளரிடம் இருந்து விடுப்பு விண்ணப்பம் ஏதும் பெறாதது எனக்கு ஆச்சரியமாக உள்ளது.

நிலநடுக்கம், தீ விபத்து, தீவிரவாதத் தாக்குதல் என எந்த ஒரு பேரிடராக இருந்தாலும், அதில் சுகாதாரத் துறை முக்கியப் பங்காற்றுகிறது. சுகாதாரத் துறை அமைச்சா் அழைத்தும் சுகாதாரத் துறை செயலாளா் கைப் பேசியை எடுக்கவில்லை. இது எப்படி நடக்கும்?. ஒரு செயலாளா் விடுப்பில் சென்றால், அவருக்குப் பதிலாக ஒரு பொறுப்புஅதிகாரி இருப்பாா்.

குழந்தைகள் நல மருத்துவமனையில் நடந்த தீ விபத்து சம்பவம் தொடா்பாக சுகாதாரத் துறை செயலாளரோ அல்லது பொறுப்பு அதிகாரியோ இதுவரை எனக்கு எந்தத் தகவலும் தெரிவிக்கவில்லை.

இத்தகைய அதிகாரிகள் மீது மத்திய அரசு நடவடிக்கை எடுக்குமா?. பச்சிளம் குழந்தைகளின் மரணம் ஒரு உணா்ச்சிமிக்க விஷயம் என்று நான் நம்புகிறேன். நான் இந்தக் கடிதத்தை துணை நிலை ஆளுநா் வி.கே. சக்சேனாவிற்கு எழுதியிருக்க வேண்டும். ஆனால், எனது கடந்த 2 வருட அனுபவத்தில் எந்தவொரு அதிகாரி மீதும் அவா் எந்த நடவடிக்கையும் எடுக்கவில்லை.துணை நிலை ஆளுநா் கூட அந்த அதிகாரிகளைப் பாதுகாப்பதில் மும்முரமாக இருக்கிறாா். அவருக்கு நிா்வாக ரீதியான புரிதல் குறைவாக இருப்பது மிகவும் துரதிருஷ்டவசமானது.

கடந்த 2 நாள்களாக சுகாதாரத் துறைச் செயலாளா் தீபக் குமாரைக் காணவில்லை என நாளிதழ்களில் செய்திகள் வெளியாகி வருகின்றன. ஆனால், இதுவரை துணைநிலை ஆளுநா் வி.கே. சக்சேனா இது தொடா்பாக எந்த நடவடிக்கையும் எடுக்கவில்லை. பச்சிளம் குழந்தைகளின் மரணம் போன்ற முக்கியமான விஷயங்களில் கூட தங்கள் பணியை விட்டு வெளியேறும் அதிகாரிகளை துணை நிலை ஆளுநா் பாதுகாப்பது மிகவும் துரதிருஷ்டவசமானது. ஒரு ஐ.ஏ.எஸ். அதிகாரியின் இத்தகைய நடத்தை மிகவும் அவதூறானது. எனவே, சுகாதாரத் துறைச் செயலாளா் தீபக் குமாா் மீது கடுமையான நடவடிக்கைக்கு பரிந்துரைக்கிறேன் என்று அந்தக் கடிதத்தில் அமைச்சா் செளரவ் பரத்வாஜ் தெரிவித்துள்ளாா்.