உலகெங்கும் கலைஞர்

உலகெங்கும் கலைஞர் (உலகத் தமிழர்களின் புகழஞ்சலி); - (தொகுப்பாசிரியர்)  வி.ஆர்.எஸ்.சம்பத்;  பக்.224; ரூ.300; சட்டக் கதிர் பப்ளிகேஷன்ஸ், 3/2 சுவாதி ராம் டவர்ஸ். ஜூபிடர் காம்ப்ளக்ஸ், 3 துர்காபாய் தேஷ்முக் சாலை, ராஜா அண்ணாமலைபுரம்,  சென்னை-28.

திமுக தலைவர் கருணாநிதி குறித்து தனித்துவத்தோடு வெளிவந்துள்ள நூல்களில் இதுவும் ஒன்று.  2020-ஆம் ஆண்டில்  கருணாநிதியின் இரண்டாம் ஆண்டு நினைவாக காணொலிக் கருத்தரங்கை நடத்தி, உலகத் தலைவர்கள் ஆற்றிய உரைகளைத் தொகுத்து ஓர் நூலாக நூலாசிரியர் வெளியிட்டுள்ளார்.

கருணாநிதியின் வாழ்க்கை வரலாறு, அவரது சாதனைகள், தமிழ்த் தொண்டுகள்,  அரசியல் ஆளுமைத் திறன் போன்றவற்றை உடனிருந்தவர்களின் அனுபவம் வாயிலாகவே நூலில் அறிய முடிகிறது. நூலுக்கு முதல்வர் மு.க.ஸ்டாலின் அணிந்துரை எழுதியுள்ளார்.

புதுவை வே.நாராயணசாமி, கி.வீரமணி, துரைமுருகன்  போன்ற ஆளுமைகளோடு,   மலேசிய முன்னாள் அமைச்சர் சாமிவேலு,  வெளிநாடுகளின் அமைச்சர்களான கயானாவின் மோசஸ் வீராசாமி, மொரீஷியஸின் பரமசிவன் பிள்ளை, தென்ஆப்பிரிக்காவின் ரவி பிள்ளை, மலேசியாவின் டாக்டர் டி.மாரிமுத்து மற்றும்ஆஸ்திரியாவின் வி.ஜெயமாலை, சிங்கப்பூரின் ஆர்.ரவீந்திரன், அமெரிக்காவின் ராஜன் நடராஜன், ஆஸ்திரேலியாவின் சூசை பெஞ்சமின் போன்ற வெளிநாட்டு ஆளுமைகள் பேச்சுகளின் வாயிலாக,  வெளிநாட்டுத் தமிழர்களின் நலனில் கருணாநிதி கொண்டுள்ள நலனை உணர்வுபூர்வமாக அறிய முடிகிறது.

நூலின் பிற்சேர்க்கையில் கருணாநிதியின் அரிய புகைப்படங்களையும் சேர்த்திருப்பது நூலுக்கு மேலும் மெருகூட்டுகிறது.