பத்தாவது ஐபிஎல் கிரிக்கெட் தொடரின் தொடக்க ஆட்டங்களில் பெங்களூர் ராயல் சேலஞ்சர்ஸ் அணியின் கேப்டன் விராட் கோலி பங்கேற்கவில்லை. இதையடுத்து ஐபிஎல் போட்டியில், தான் களமிறங்கும் தேதியை கோலி அறிவித்துள்ளார். 

ஆஸ்திரேலியாவுக்கு எதிரான 3-வது டெஸ்ட் கிரிக்கெட் போட்டியின்போது கோலிக்குத் தோள்பட்டையில் காயம் ஏற்பட்டது. இதையடுத்து அவர் 4-வது டெஸ்ட் போட்டியில் விளையாடவில்லை. 4-வது டெஸ்ட் போட்டிக்குப் பிறகு செய்தியாளர்களைச் சந்தித்த கோலி, 'எனது காயம் 100 சதவீதம் குணமடைய இன்னும் சில வாரங்கள் ஆகும்' எனத் தெரிவித்திருந்தார். அதனால் அவர் ஐபிஎல் தொடக்க ஆட்டங்களில் பங்கேற்கவில்லை. கோலி இன்றி இதுவரை 3 ஆட்டங்களில் ஆடியுள்ள பெங்களூர் அணி இரண்டில் தோல்வியைச் சந்தித்துள்ளது. 

இந்நிலையில், ஏப்ரல் 14 அன்று பெங்களூரில் பெங்களூருக்கும் மும்பை இந்தியன்ஸுக்கும் இடையே ஐபிஎல் போட்டி நடக்கவுள்ளது. இதில் தான் கலந்துகொள்ள வாய்ப்பிருப்பதாக கோலி, இன்ஸ்டகிராம் சமூகவலைத்தளத்தில் தகவல் அளித்துள்ளார்.