ஐசிசி டெஸ்ட் கிரிக்கெட் பேட்ஸ்மேன்கள் தரவரிசைப் பட்டியலில் இந்தியாவின் விராட் கோலி இரண்டாவது இடத்துக்கு முன்னேறியுள்ளார். புஜாரா 4-ம் இடத்துக்கு இறங்கியுள்ளார்.
இலங்கைக்கு எதிரான டெஸ்ட் தொடரில் மிகச் சிறப்பான ஆட்டத்தை வெளிப்படுத்தி இரு இரட்டைச் சதங்கள் உள்ளிட்ட மூன்று சதங்களுடன் 610 ரன்கள் எடுத்தார் கோலி. இதன்மூலம் 2-வது இடத்தைப் பிடித்துள்ளார். முதலிடத்தில் 938 புள்ளிகளுடன் ஆஸ்திரேலியாவின் ஸ்டீவ் ஸ்மித் உள்ளார்.
ஸ்மித், கோலி, ரூட், புஜாரா, கேன் வில்லியம்சன் ஆகியோர் முதல் ஐந்து இடங்களைப் பிடித்துள்ளார்கள்.
ஐசிசி டெஸ்ட் கிரிக்கெட் பந்துவீச்சாளர்கள் பட்டியலில், இந்திய அணியின் ரவீந்திர ஜடேஜா 870 புள்ளிகளுடன் மூன்றாம் இடத்திலும் அஸ்வின் 4-ம் இடத்திலும் உள்ளார்கள்.
ஜேம்ஸ் ஆண்டர்சன், ரபடா, ஜடேஜா, அஸ்வின், ஹெராத் ஆகியோர் பந்துவீச்சாளர்கள் பட்டியலில் முதல் ஐந்து இடங்களைப் பிடித்துள்ளார்கள்.
ஆல்ரவுண்டர்கள் வரிசையில் ஜடேஜா 2-ம் இடத்திலும் அஸ்வின் 4-ம் இடத்திலும் உள்ளார்கள்.
ஷகிப் அல் ஹசன், ஜடேஜா, பென் ஸ்டோக்ஸ், அஸ்வின், மொயீன் அலி ஆகியோர் ஆல்ரவுண்டர்கள் பட்டியலில் முதல் ஐந்து இடங்களைப் பிடித்துள்ளார்கள்.
டெஸ்ட் தரவரிசையில் இந்திய அணி முதலிடத்தில் நீடிக்கிறது. இந்தியா, தென் ஆப்பிரிக்கா, இங்கிலாந்து, நியூஸிலாந்து, ஆஸ்திரேலியா ஆகிய அணிகள் முதல் ஐந்து இடங்களைப் பிடித்துள்ளன. இந்திய அணி ஒருநாள் தரவரிசையில் 2-ம் இடத்திலும் டி20 தரவரிசையில் ஐந்தாம் இடத்திலும் உள்ளது.
டெஸ்ட் தரவரிசையில் 2-ம் இடத்துக்கு முன்னேறியுள்ள விராட் கோலி - ஒருநாள் மற்றும் டி20 போட்டிகளில் முதலிடம் வகிக்கிறார்.