ஆஸ்திரேலியாவின் முன்னணி வேகப்பந்து வீச்சாளரான மிட்செல் ஸ்டார்க் வலது காலில் ஏற்பட்ட காயம் காரணமாக இந்தியாவுக்கு எதிரான டெஸ்ட் தொடரில் இருந்து விலகியுள்ளார். அவருக்குப் பதிலாக பேட் கம்மின்ஸ் அணியில் சேர்க்கப்பட்டுள்ளார்.

புணேவில் நடைபெற்ற முதல் டெஸ்டில் பேட்டிங், பெளலிங் என இரண்டிலும் அசத்திய ஸ்டார்க்கின் வலது கால் எழும்பில் லேசான காயம் ஏற்பட்டுள்ளது. இது ஆஸ்திரேலிய அணிக்கு மிகப்பெரிய பின்னடைவாகும். இது குறித்து ஆஸ்திரேலிய முடநீக்கியல் நிபுணர் டேவிட் பீக்லே கூறுகையில், "பெங்களூரில் நடைபெற்ற 2-ஆவது டெஸ்ட் போட்டியின்போது மிட்செல் ஸ்டார்க்கின் வலது காலில் வலி ஏற்பட்டது. இதையடுத்து அவருக்கு ஸ்கேன் பரிசோதனை மேற்கொள்ளப்பட்டது. அதில் அவருடைய வலது கால் எழும்புப் பகுதியில் லேசான காயம் ஏற்பட்டிருப்பது தெரியவந்தது. சிகிச்சைக்காக அவர் நாடு திரும்புகிறார்' என்றார். ஏற்கெனவே மிட்செல் மார்ஷ் காயம் காரணமாக விலகிய நிலையில், இப்போது மிட்செல் ஸ்டார்க்கும் விலகியிருப்பது குறிப்பிடத்தக்கது. இது தொடர்பாக முன்னாள் ஆஸ்திரேலிய கேப்டன் மைக்கேல் கிளார்க் கூறுகையில், "ஸ்டார்க்கின் விலகல், ஆஸ்திரேலிய அணிக்கு மிகப்பெரிய பின்னடைவாகும். அது நிச்சயமாக ஆஸ்திரேலியாவின் வெற்றியைப் பாதிக்கும்' என்றார்.

இந்நிலையில் ஸ்டார்க்குக்குப் பதிலாக வேகப்பந்து வீச்சாளர் பேட் கம்மின்ஸ் அணியில் சேர்க்கப்பட்டுள்ளார்.