தீபக்குமார், லக்ஷய் ஷெரோன் வென்றனர்
ஜகார்த்தா ஆசியப் போட்டியில் இரண்டாம் நாளான செவ்வாய்க்கிழமை துப்பாக்கி சுடுதலில் இந்தியாவின் முதல் வெள்ளிப் பதக்கத்தை வென்றார் தீபக்குமார். அவரைத் தொடர்ந்து ஆடவர் ட்ராப் துப்பாக்கி சுடுதலில் லக்ஷய் ஷெரோன் வெள்ளிப் பதக்கம் வென்றார்.
18-ஆவது ஆசியப் போட்டிகள் ஜகார்த்தா, பாலேம்பங் நகரங்களில் ஞாயிற்றுக்கிழமை கோலாகலமாகத் தொடங்கின. முதல் நாளான திங்கள்கிழமை துப்பாக்கி சுடுதல் கலப்பு அணி ரைபிள் பிரிவில் இந்திய இணை அபூர்வி சந்தேலா-ரவிக்குமார் இணை போட்டியின் முதல் பதக்கமாக வெண்கலத்தை வென்றது. அதைத் தொடர்ந்து மல்யுத்தம் ஆடவர் 65 கிலோ ப்ரீ ஸ்டைல் பிரிவில் பஜ்ரங் புனியா முதல் தங்கப் பத்கத்தை வென்றார். முதல் நாள் பதக்கப்பட்டியலில் இந்தியா 11-ஆவது இடத்தைப் பெற்றிருந்தது.
இந்நிலையில் செவ்வாய்க்கிழமை துப்பாக்கி சுடுதல் ஆடவர் 10 மீ ஏர் பிஸ்டல் பிரிவில் 10-க்கு 9 ஷாட்களுடன் 247.7 புள்ளிகள் எடுத்து வெள்ளிப் பதக்கம் வென்றார். சீனா இதில் தங்கம் வென்றது.ரவிக்குமார் 4-ஆம் இடம் பெற்று வெளியேறினார். 
அதே போல் மகளிர் 10 மீ ஏர் ரைபிள் பிரிவில் இந்திய வீராங்கனை அபூர்வி சந்தேலா 9.8 புள்ளிகள் மட்டுமே எடுத்து 5-ஆம் இடம் பெற்றதால் தோல்வியுற்று வெளியேறினார். இவர் கலப்பு அணிகள் பிரிவில் வெண்கலப் பதக்கம் வென்றிருந்தார் என்பது குறிப்பிடத்தக்கது.
அதே நேரத்தில் ஆடவர் ட்ராப் துப்பாக்கி சுடுததில் 45-க்கு 35 ஷாட்கள் என்ற அடிப்படையில் லக்ஷய் ஷெரோன் இரண்டாம் இடத்துடன் வெள்ளிப் பதக்கம் வென்றார். 
துப்பாக்கி சுடுதலில் 2 வெள்ளி, 1 வெண்கலத்துடன் மொத்தம் 3 பதக்கங்கள் கிட்டியுள்ளன.