மியாமி ஓபன்:அரையிறுதியில் போட்ரோ-இஸ்னர் இன்று மோதல்

அமெரிக்காவில் நடைபெற்றுவரும் மியாமி ஓபன் டென்னிஸ் போட்டியின் ஆடவர் ஒற்றையர் பிரிவில் வெள்ளிக்கிழமை நடைபெறவுள்ள அரையிறுதி ஆட்டத்தில் ஆர்ஜென்டீனாவின் ஜே.எம்.டெல் போட்ரோவும், அமெரிக்காவின் ஜான் இஸ்னரும் மோதவுள்ளனர்.
முன்னதாக, வியாழக்கிழமை நடைபெற்ற காலிறுதிச் சுற்றில் போட்டித் தரவரிசையில் 20-ஆவது இடத்தில் இருக்கும் கனடாவின் மிலோஸ் ரயோனிச்சை எதிர்கொண்டார் போட்ரோ.
இந்த ஆட்டத்தில் மூன்று செட்களும் 'டை பிரேக்கர்' சுற்று வரை சென்றது. இதனால், வெற்றி பெற இருவருமே கடுமையாகப் போராட வேண்டியதாக இருந்தது.
முதல் செட்டை 5-7 என்ற கணக்கில் இழந்த போட்ரோ, அடுத்த செட்டை 7-6 (7-1) என்ற கணக்கிலும், வெற்றியைத் தீர்மானிக்கும் 3-ஆவது மற்றும் இறுதி செட்டை 7-6 (7-3) என்ற கணக்கிலும் கைப்பற்றி அரையிறுதிக்கு முன்னேறினார்.
மற்றொரு ஆடவர் பிரிவு காலிறுதிச் சுற்றில் தென் கொரியாவின் சங் யியனை 6-1, 6-4 என்ற நேர் செட் கணக்கில் எளிதில் வீழ்த்தி, அரையிறுதிக்கு முன்னேறினார் ஜான் இஸ்னர்.
ஜான் இஸ்னரும், போட்ரோவும் மோதும் ஆட்டம் வெள்ளிக்கிழமை இரவு 7.30 மணிக்கு நடைபெறவுள்ளது.
வெளியேறினார் வீனஸ்: மகளிர் ஒற்றையர் பிரிவில் போட்டித் தரவரிசையில் 8-ஆவது இடத்தில் இருந்த அமெரிக்காவின் முன்னணி டென்னிஸ் வீராங்கனைகளில் ஒருவரான வீனஸ் வில்லியம்ஸ், 2-6, 3-6 என்ற நேர் செட் கணக்கில் சக நாட்டவரான டி.ஆர்.காலின்ஸிடம் வீழ்ந்தார். அரையிறுதியில் லாத்வியாவின் ஜலேனாவை வெள்ளிக்கிழமை எதிர்கொள்கிறார் காலின்ஸ்.