புவனேஸ்வர் குமார் தான் அநத்ப பணிக்கு என்று ஏற்கனவே தெளிவாக முடிவெடுத்துவிட்டதாக பந்துவீச்சு பயிற்சியாளர் பரத் அருண் தெரிவித்தார். இதுதொடர்பாக அவர் கூறுகையில்,

ஜஸ்ப்ரீத் பும்ரா உலகின் தலைசிறந்த வேகப்பந்துவீச்சாளர்களில் ஒருவராகத் திகழ்கிறார். ஆட்டத்தின் தொடக்கத்திலும், முடிவிலும் அவருடைய பந்துவீசும் தரம் வியக்க வைக்கிறது. அவரைப் போன்ற ஒரு வேகப்பந்துவீச்சாளர் இந்திய அணிக்கு கிடைத்திருப்பது பொக்கிஷம் போன்றது. 

அதேபோன்று குல்தீப் யாதவ் மிகச்சிறந்த சுழற்பந்துவீச்சாளர், அரிய திறமையை உடையவர். பேட்ஸ்மேன்களைப் போன்று பந்துவீச்சாளர்களும் அவ்வப்போது சரியாக பங்களிப்பு வழங்க இயலாமல் திணறுவார்கள். அதுபோன்ற நேரங்களில் கடந்த காலத்தில் அந்த குறிப்பிட்ட வீரர் சாதித்துள்ளதை நினைவுகூறச் செய்வது தான் எனது முதல் பணி. 

சில நேரங்களில் தங்கள் அடிப்படைகளை விட்டு சிறிது விலகிச் செல்வார்கள். அதுபோன்ற வீரர்களுக்கு சரியான பாதையை காண்பித்து வெற்றிபெறச் செய்ய வேண்டும். ஐபிஎல் சறுக்கலுக்குப் பின்னர் குல்தீப் யாதவ் தற்போது மீண்டும் தனது திறமைகளை அடையாளம் கண்டுகொண்டு சிறப்பாக செயல்படத் தொடங்கியுள்ளார்.

இந்திய வேகப்பந்துவீச்சைப் பொறுத்தவரையில், பும்ரா தான் முதன்மையானவர். அவருடன் முகமது ஷமி பல போட்டிகளில் களமிறங்கி சாதித்துள்ளார். முகமது ஷமியும் சிறந்த வேகப்பந்துவீச்சாளர் தான். ஆனால், உலகக் கோப்பைக்கு முன்னதாகவே புவனேஸ்வர் குமார் தான் பும்ரா உடன் இணைந்து பந்துவீசுவார் என்று நாங்கள் தெளிவாக திட்டமிட்டு முடிவெடுத்தோம்.

ஏனென்றால் இங்கிலாந்து ஆடுகளங்களில் பந்து ஸ்விங் ஆகும். அதில் புவனேஸ்வர் கைதேர்ந்தவர். எனவே பும்ராவும் புவனேஸ்வரும் தான் இந்திய வேகப்பந்துவீச்சு ஜோடி என்பதை தீர்மானித்தோம். இந்த தொடரில் ஷமிக்கு வாய்ப்புகள் கிடைக்கலாம். அணியில் உள்ள ஒவ்வொரு வீரரும் தங்களுக்கான வாய்ப்புக்காக காத்திருக்க வேண்டும். கிடைக்கும் வாய்ப்பை சரியாகப் பயன்படுத்திக்கொள்ள வேண்டும் என்றார்.