மோசமாக விளையாடும் தவனின் நிலை என்ன?: இந்திய பேட்டிங் பயிற்சியாளர் பதில்!

இந்தியாவுக்கு எதிரான மூன்றாவது ஒரு நாள் ஆட்டத்தில் ஆஸ்திரேலிய அணி 32 ரன்கள் வித்தியாசத்தில் வெற்றி பெற்றது.

ஜார்க்கண்ட் மாநிலம், ராஞ்சியில் வெள்ளிக்கிழமை நடைபெற்ற இந்த ஆட்டத்தில் முதலில் விளையாடிய ஆஸி., 50 ஓவர்கள் முடிவில் 5 விக்கெட் இழப்புக்கு 313 ரன்கள் குவித்தது. 314 ரன்கள் எடுத்தால் வெற்றி என்ற கடின இலக்குடன் விளையாடிய இந்திய அணி, 48.2 ஓவர்களில் அனைத்து விக்கெட்டுகளையும் இழந்து 281 ரன்கள் மட்டுமே எடுத்து தோல்வியைத் தழுவியது. கேப்டன் கோலியின் சதமும் வீணானது. 5 ஒரு நாள் ஆட்டங்கள் கொண்ட தொடரில் 2-1 என்ற கணக்கில் இந்தியா முன்னிலை வகிக்கிறது. 4ஆவது ஒரு நாள் ஆட்டம் ஞாயிற்றுக்கிழமை மொஹலியில் நடைபெறவுள்ளது.

இந்தியத் தொடக்க வீரர் தவன் சமீபகாலமாக மோசமாக விளையாடி வருகிறார். கடந்த 17 ஒருநாள் ஆட்டங்களில் 50-க்கும் அதிகமான ரன்களை இருமுறை மட்டுமே எடுத்துள்ளார். 2019-ல் 11 இன்னிங்ஸில் 265 ரன்கள் எடுத்துள்ளார். தவன் ஃபார்மில் இல்லாதது இந்திய அணிக்குக் கவலையை ஏற்படுத்துகிறதா? இதுகுறித்து பேட்டிங் பயிற்சியாளர் சஞ்சய் பங்கர் கூறியதாவது:

கடந்த ஆட்டத்தில் தவன் நன்றாக விளையாடி வந்தார். தவறான ஒரு ஷாட்டில் ஆட்டமிழந்தார். என்னைப் பொறுத்தவரை அவர் முக்கியமான வீரர். அவர் நன்கு விளையாடும்போது நமக்கு நல்ல தொடக்கத்தை அளிக்கிறார். மேலும், இடது - வலது கூட்டணி இருப்பது முக்கியமானது. மிகவும் மதிப்புமிக்க வீரர். அவர் விரைவில் தனது ஃபார்மை அடைவார் என எண்ணுகிறோம் என்று கூறியுள்ளார்.