இந்த வருட ரஞ்சிப் போட்டியில் தமிழக கிரிக்கெட் அணி தனது முதல் வெற்றியைப் பெற்றுள்ளது.

5 ஆட்டங்களில் 5 புள்ளிகள் மட்டுமே பெற்றிருந்த தமிழக அணி, ரயில்வே அணியை இன்னிங்ஸ் வெற்றியுடன் வீழ்த்தி 7 புள்ளிகளைப் பெற்றுள்ளது.

சென்னையில் நடைபெற்ற ஆட்டத்தில் முதலில் விளையாடிய ரயில்வே அணி, முதல் இன்னிங்ஸில் 76 ரன்களுக்குச் சுருண்டது. அஸ்வின், சித்தார்த் தலா 4 விக்கெட்டுகளை வீழ்த்தினார்கள்.

தமிழக அணி முதல் இன்னிங்ஸில் 330 ரன்கள் எடுத்து அசத்தியது. முகுந்த் 100 ரன்களும் தினேஷ் கார்த்திக் 58 ரன்களும் எடுத்தார்கள். ஹர்ஷ் தியாகி 5 விக்கெட்டுகளை வீழ்த்தினார்.

பிறகு தனது 2-வது இன்னிங்ஸில் விளையாடிய ரயில்வே அணி, மீண்டும் மோசமாக பேட்டிங் செய்து 90 ரன்களுக்கு அனைத்து விக்கெட்டுகளையும் இழந்தது. சாய் கிஷோர் 5 விக்கெட்டுகளும் அஸ்வின் 3 விக்கெட்டுகளும் வீழ்த்தினார்கள். 

இதனால் இந்த ஆட்டத்தில் ஒரு இன்னிங்ஸ் மற்றும் 164 ரன்கள் வித்தியாசத்தில் வென்று 7 புள்ளிகளைப் பெற்றது தமிழக அணி.