வங்கதேச அணிக்கு எதிரான முதல் டெஸ்டை 8 விக்கெட் வித்தியாசத்தில் வென்றுள்ளது பாகிஸ்தான் அணி. 

டி20 உலகக் கோப்பைப் போட்டியில் சூப்பர் 12 சுற்றில் வங்கதேச அணி விளையாடிய 5 ஆட்டங்களிலும் தோற்றது. அடுத்ததாக, சொந்த மண்ணில் பாகிஸ்தானுக்கு எதிராக 3 டி20, 2 டெஸ்ட் ஆட்டங்களில் அந்த அணி விளையாடுகிறது. டி20 தொடரில் 3-0 என முழுமையாக வென்றது பாகிஸ்தான் அணி. நவம்பர் 26 முதல் டெஸ்ட் தொடர் தொடங்கியது.

வங்கதேச அணி முதலில் பேட்டிங் செய்து 330 ரன்கள் எடுத்தது. பாகிஸ்தான் அணி முதல் இன்னிங்ஸில் 286 ரன்களுக்கு அனைத்து விக்கெட்டுகளையும் இழந்தது. எனினும் 2-வது இன்னிங்ஸில் வங்கதேசத்தை 157 ரன்களுக்கு ஆட்டமிழக்கச் செய்தது. இதனால் முதல் டெஸ்டில் வெற்றி பெற பாகிஸ்தானுக்கு 202 ரன்கள் இலக்கு நிர்ணயிக்கப்பட்டது.

பாகிஸ்தான் அணி, 58.3 ஓவர்களில் 2 விக்கெட் இழப்புக்கு 203 ரன்கள் எடுத்து வெற்றி பெற்றது. அபித் அலி 91 ரன்களும் அப்துல்லா ஷஃபிக் 73 ரன்களும் எடுத்தார்கள். இதனால் முதல் டெஸ்டை 8 விக்கெட் வித்தியாசத்தில் வென்றுள்ள பாகிஸ்தான் அணி, டெஸ்ட் தொடரில் 1-0 என முன்னிலை வகிக்கிறது. அபித் அலி, ஆட்ட நாயகனாகத் தேர்வானார். 

2-வது டெஸ்ட், டிசம்பர் 4 அன்று தொடங்குகிறது.