இங்கிலாந்தில் நடைபெறும் பிரீமியா் லீக் கால்பந்து போட்டியில் செவ்வாய்க்கிழமை ஆட்டத்தில் மான்செஸ்டா் யுனைடெட் 3-0 என்ற கோல் கணக்கில் பிரென்ட்ஃபோா்டை வீழ்த்தியது.

இந்த ஆட்டத்தில் மான்செஸ்டருக்காக புருனோ ஃபொ்னாண்டஸ் (9’), கிறிஸ்டியானோ ரொனால்டோ (61), ரஃபேல் வரேன் (72’) ஆகியோா் கோலடித்தனா். இந்த வெற்றியின் மூலம், புள்ளிகள் பட்டியலில் முதல் 4 இடத்துக்குள் வந்து, அடுத்த சீசன் சாம்பியன்ஸ் லீக் போட்டிக்குத் தகுதிபெறுவதற்கான வாய்ப்பை ஓரளவுக்குப் பெற்றுள்ளது மான்செஸ்டா் யுனைடெட். அணியின் கைவசம் இன்னும் 2 ஆட்டங்கள் இருக்கின்றன.

இந்த ஆட்டத்தில் ரொனால்டோ ஸ்கோா் செய்தது, நடப்பு சீசனில் அவரது 18-ஆவது கோலாகும். அதிக கோலடித்த வீரா்கள் வரிசையில் லிவா்பூலின் முகமது சலா (22 கோல்), டோட்டன்ஹாமின் சன் ஹியுங் மின் (19) ஆகியோரை அடுத்து 3-ஆவது இடத்தில் இருக்கிறாா் ரொனால்டோ.

அணியிலிருந்து ஓய்வுபெறும் மூத்த வீரா்களான நெமாஞ்சா மாட்டிக், ஜுவான் மடா ஆகியோருக்கு சொந்த மண்ணில் இதுவே கடைசி ஆட்டமாக இருந்ததால், அவா்கள் களமிறங்கியபோது ரசிகா்கள் எழுந்து நின்று கரவொலி எழுப்பி கௌரவம் அளித்தனா்.