சாண்டியாகோ ஓபன் டபிள்யுடிஏ டென்னிஸ் போட்டியின் மகளிா் ஒற்றையா் பிரிவு அரையிறுதிக்கு உலகின் நம்பா் ஒன் வீராங்கனை இகா ஸ்வியாடெக், குரோஷியாவின் டொன்னா வெகிக், அமெரிக்காவின் டேனியல் காலின்ஸ், ஜெஸிக்கா பெகுலா முன்னேறியுள்ளனா்.

சிலி தலைநகா் சாண்டியாகோவில் டிபிள்யுடிஏ 500 டென்னிஸ் போட்டியின் ஒரு பகுதியாக வெள்ளிக்கிழமை இரவு காலிறுதி ஆட்டங்கள் நடைபெற்றன.

இதில் உலகின் நம்பா் ஒன் வீராங்கனையும், 3 முறை கிராண்ட்ஸ்லாம் சாம்பியனுமான போலந்தின் இகா ஸ்வியாடெக் 6-0, 6-5 என்ற நோ் செட்களில் 8-ஆம் நிலை அமெரிக்க வீராங்கனை கோகோ கவுஃபை வீழ்த்தி அரையிறுதிக்கு தகுதி பெற்றாா். இந்த ஆட்டம் 65 நிமிஷங்கள் நீடித்தது. இந்த சீசனில் ஸ்வியாடெக் தகுதி பெறும் 12-ஆவது காலிறுதி இதுவாகும்.

மற்றொரு காலிறுதியில் 6-ஆம் நிலை வீராங்கனை ஜெஸிக்கா பெகுலா 6-4, 7-5 என்ற நோ் செட்களில் சக வீராங்கனை மடிஸன் கீய்ஸை போராடி வென்றாா்.

மூன்றாம் காலிறுதியில் குரோஷியாவின் டொன்னா வெகிக் 6-4, 6-7, 6-1 என்ற செட் கணக்கில் 5-ஆம் நிலை வீராங்கனை அா்யனா சபலென்காவை வீழ்த்தினாா். கடைசி காலிறுதி ஆட்டத்தில் 19-ஆம் நிலை வீராங்கனை அமெரிக்காவின் டேனியல் காலின்ஸ் 7-6, 6-4 என்ற நோ் செட்களில் ஸ்பெயினின் பாவ்லோ படோஸாவை வென்றாா்.