டி20 உலகக் கோப்பைக்கான மேற்கிந்தியத் தீவுகள் அணியைத் தேர்வு செய்வதில் ஷமர் ஜோசப் தலைவலியை ஏற்படுத்தியுள்ளதாக அந்த அணியின் பயிற்சியாளர் டேரன் சம்மி தெரிவித்துள்ளார். 

டி20 உலகக் கோப்பை வருகிற ஜூன் மாதத்தில் அமெரிக்கா மற்றும் மேற்கிந்தியத் தீவுகளில் நடைபெறவுள்ளது. 50 ஓவர் உலகக் கோப்பை முடிவடைந்த சில மாதங்களிலேயே டி20 உலகக் கோப்பை தொடங்கவிருப்பதால் அனைத்து அணிகளும் கோப்பையை வெல்லும் முனைப்போடு தங்களை தயார்படுத்தி வருகின்றன. 

இதையும் படிக்க: விராட் கோலியிடம் கற்றுக் கொள்ள முயற்சிக்கிறேன்: ரஜத் படிதார்

இந்த நிலையில், டி20 உலகக் கோப்பைக்கான மேற்கிந்தியத் தீவுகள் அணியைத் தேர்வு செய்வதில் ஷமர் ஜோசப் தலைவலியை ஏற்படுத்தியுள்ளதாக அந்த அணியின் பயிற்சியாளர் டேரன் சம்மி தெரிவித்துள்ளது முக்கியத்துவம் பெறுகிறது. 

இது தொடர்பாக அவர் பேசியதாவது: மேற்கிந்தியத் தீவுகள் வீரர் ஷமர் ஜோசப் அனைத்து வடிவிலான போட்டிகளுக்குமான வீரர். டி20 உலகக் கோப்பையில் மேற்கிந்தியத் தீவுகள் அணியில் இடம்பிடிப்பதற்கான போட்டியாளராக அவர் உருவெடுத்திருக்கிறார். ஆனால், வீரர்களைத் தேர்வு செய்வதற்கு நடைமுறை இருக்கிறது. அதன்படியே நானும் கிரிக்கெட் வாரியத் தலைவர், தேர்வுக்குழு உறுப்பினர்களும் செயல்படுகின்றோம். டி20 உலகக் கோப்பை தொடங்கவுள்ள சமயத்தில் தனது அபார பந்துவீச்சுத் திறமையால் ஒரு சிறந்த தலைவலியை ஷமர் ஜோசப் உருவாக்கியுள்ளார் என்றார்.

இதையும் படிக்க: பேஷ்பால் யுக்தியை எதிர்கொள்ள எங்களிடம் திட்டங்கள் உள்ளன: கே.எஸ்.பரத்

ஆஸ்திரேலியாவுக்கு எதிரான இரண்டாவது டெஸ்ட் போட்டியில் மேற்கிந்தியத் தீவுகள் 8  ரன்கள் வித்தியாசத்தில் வரலாற்று வெற்றியைப் பதிவு செய்தது. அந்தப் போட்டியின் இரண்டாவது இன்னிங்ஸில் 7 விக்கெட்டுகளை வீழ்த்தி மேற்கிந்தியத் தீவுகளின் வெற்றிக்கு ஷமர் ஜோசப் உதவியது குறிப்பிடத்தக்கது.