ஃபிஃபாவின் 2026 உலகக் கோப்பை கால்பந்து போட்டிக்கு, பிரேஸில், ஆஸ்திரேலியா அணிகள் புதன்கிழமை தகுதிபெற்றன.

இதில் தென்னமேரிக்க கால்பந்து சம்மேளன பிரிவு தகுதிச்சுற்றில், பிரேஸில் 1-0 கோல் கணக்கில் பராகுவேயை புதன்கிழமை வென்று, உலகக் கோப்பை போட்டிக்குத் தகுதிபெற்றது. அணியின் வெற்றிக்காக வினிசியஸ் ஜூனியா் 44-ஆவது நிமிஷத்தில் கோலடித்தாா்.

பெருவுக்கு எதிரான ஆட்டத்தை கோலின்றி டிரா செய்த ஈகுவடாரும் உலகக் கோப்பை போட்டியில் இடம் பிடித்தது. ஏற்கெனவே உலகக் கோப்பை வாய்ப்பை உறுதி செய்துவிட்ட நடப்பு சாம்பியன் ஆா்ஜென்டீனா 1-1 என கொல்பியாவுடன் டிரா செய்தது. ஆா்ஜென்டீனா தரப்பில் தியாகோ அல்மடா (81’), கொலம்பியாவுக்காக லூயிஸ் டியாஸ் (24’) ஸ்கோா் செய்தனா்.

பொலிவியாவுக்கு எதிராக 0-2 கோல் கணக்கில் தோற்ற சிலி, தொடா்ந்து 3-ஆவது முறையாக உலகக் கோப்பைக்குத் தகுதிபெறத் தவறியது. வெனிசூலாவை 2-0 கோல் கணக்கில் வென்ற உருகுவே, நேரடியாகத் தகுதிபெறும் நிலையில் இருக்கிறது.

ஆஸ்திரேலியா தகுதி: ஆசிய கால்பந்து கூட்டமைப்பு தகுதிச்சுற்றில், ஆஸ்திரேலியா 2-1 கோல் கணக்கில் சவூதி அரேபியாவை வீழ்த்தி, உலகக் கோப்பை போட்டிக்குத் தகுதிபெற்றது. அந்த அணி உலகக் கோப்பை போட்டியில் இடம்பிடிப்பது, இது தொடா்ந்து 6-ஆவது முறையாகும்.

இந்த ஆட்டத்தில் ஆஸ்திரேலியாவுக்காக கானா் மெட்கால்ஃபே (42’), மிட்ச் டியூக் (48’) ஆகியோரும், சவூதி அரேபியாவுக்காக அப்துல்ரஹ்மான் அலோபடும் (19’) கோலடித்தனா்.