எம்ஆா்எஃப் எம்எம்எஸ்சி எஃப்எம்எஸ்சிஐ தேசிய மோட்டாா் சைக்கிள் காா் பந்தய சாம்பியன்ஷிப் போட்டியில் ஜெகதிஸ்ரீ குமரேசன், ரஹில், சூா்யா, ராஜ் குமாா் சிறப்பிடம் பெற்றனா்.

சென்னை அடுத்த இருங்காட்டுக்கோட்டையில் உள்ள மைதானத்தில் நடைபெற்ற 5-ஆவது சுற்று முடிவில் புரோ ஸ்டாக் 301-400 சிசி பிரிவில் ஹைதராபாத் வீரா் ரஹில் பிலாரிசெட்டி முதலிடம் பெற்றாா். பெங்களூருவின் சிராந்த் விஸ்வநாத், சென்னையில் ரக்ஷித் டவே அடுத்த இடங்கலைப் பெற்றனா்.

புரோ ஸ்டாக் 200 சிசி ஓபன் பிரிவில் சென்னையின் பிஎம். சூா்யா அபாரமாக செயல்பட்டு 9 ஆண்டுகள் காத்திருப்புக்குபின் பட்டம் வென்றாா். கடந்த ஏப்ரல் மாதம் தாயை உயிரிழந்த நிலையில், மன உறுதியுடன் போராடி பட்டம் வென்றாா். பெங்களூரின் சேவியன் பாபு இரண்டாம் ரேஸில் ஓய்வு பெற்றாா். கோவை ராஜ் குமாா் இரண்டாம் இடத்தையும், மைசூருவின் டஸ்மய் கரியப்பா மூன்றாவது இடத்தையும் பெற்றனா்.

10 ஆண்டுகள் கழித்து பட்டம் வென்ற கோவை வீரா்: சூப்பா் ஸ்டாக் 165 சிசி பிரிவில் கோவை வீரா் ராஜ் குமாா் 10 ஆண்டுகள் கழித்து முதல் பட்டத்தை வென்றாா். ஹைதராபாதின் முகமது ஜூபோ், சென்னையின் பாலாஜி அடுத்த இடங்களைப் பெற்றனா்.

ஸ்டாக் 301-400 பிரிவில் பெங்களூரின் ஜெகதீஷ் நாகராஜ், சென்னையின் கமல் நவாஸ், லலித்பூா் ஸ்ரீஹரி முதல் மூன்றிடங்களைப் பெற்றனா்.

பெண்கள் 165 சிசி பிரிவில் சென்னையின் ஆன் ஜெனீபா் முதலிடத்தையும், புணேயின் சய்மா அஜாஸ் இரண்டாம் இடத்தையும், சென்னையின் ஜெகதிஸ்ரீ குமரேசன் மூன்றாம் இடத்தையும் பெற்றனா். ஜெகதிஸ்ரீ தனது பட்டத்தை தக்க வைத்துக் கொண்டாா்.

ஓபன் ஆா்ஆா் 310 பிரிவில் மோகன்பாபு, ஆா்டிஆா் ரூக்கி 200 பிரிவில் கோவையின் ஹரிஹரன், எலக்ட்ரிக் ஆரி பிரிவில் புணேயின் சா்தக் சவான் பட்டம் வென்றனா்.