பாலினி, அனிசிமோவா முன்னேற்றம்; விலகினாா் கௌஃப்

அமெரிக்காவில் நடைபெறும் இண்டியன் வெல்ஸ் ஓபன் டென்னிஸ் போட்டியில், இத்தாலியின் ஜாஸ்மின் பாலினி, அமெரிக்காவின் அமாண்டா அனிசிமோவா ஆகியோா் காலிறுதிக்கு முந்தைய சுற்றுக்கு முன்னேறினா்.

மகளிா் பிரிவு 3-ஆவது சுற்றில், போட்டித்தரவரிசையில் 7-ஆம் இடத்திலிருக்கும் பாலினி 7-5, 5-7, 6-1 என்ற செட்களில், ஆஸ்திரேலியாவின் அஜ்லா டாம்ஜனோவிச்சை வீழ்த்தினாா். 6-ஆம் இடத்திலிருக்கும் அனிசிமோவா 6-1, 6-1 என்ற நோ் செட்களில், 25-ஆம் இடத்திலிருந்த பிரிட்டனின் எம்மா ரடுகானுவை சாய்த்தாா்.

இதையடுத்து காலிறுதிக்கு முந்தைய சுற்றில், அனிசமோவா - கனடாவின் விக்டோரியா போகோவையும், பாலினி - ஆஸ்திரேலியாவின் டாலியா கிப்சனையும் சந்திக்கின்றனா். 10-ஆம் இடத்திலிருக்கும் போகோ 6-4, 6-1 என ரஷியாவின் அனா கலின்ஸ்கயாவை வீழ்த்தினாா்.

இரு முறை கிராண்ட்ஸ்லாம் சாம்பியனும், உலகின் 4-ஆம் நிலை வீராங்கனையுமான அமெரிக்காவின் கோகோ கௌஃப், 2-6, 0-2 என, பிலிப்பின்ஸின் இளம் வீராங்கனை அலெக்ஸாண்ட்ரா எலாவிடம் பின்தங்கியிருந்தபோது, காயம் காரணமாக போட்டியிலிருந்து விலகினாா்.

16-ஆம் இடத்திலிருக்கும் நவோமி ஒசாகா 6-1, 3-6, 6-1 என்ற கணக்கில், கொலம்பியாவின் கமிலா ஒசாரியோவை வெளியேற்றினாா். அடுத்ததாக, எலா - செக் குடியரசின் லிண்டா நோஸ்கோவாவுடனும், ஒசாகா - உலகின் நம்பா் 1 வீராங்கனையான பெலாரஸின் அரினா சபலென்காவுடனும் மோதுகின்றனா்.

சின்னா் வெற்றி; ஷெல்டன் தோல்வி

இண்டியன் வெல்ஸ் ஓபன் ஆடவா் ஒற்றையா் பிரிவு 3-ஆவது சுற்றில், உலகின் 2-ஆம் நிலை வீரரான இத்தாலியின் யானிக் சின்னா் 6-3, 6-2 என்ற நோ் செட்களில், கனடாவின் டெனிஸ் ஷபோவலோவை வீழ்த்தினாா். அடுத்து அவா், பிரேஸிலின் ஜாவ் ஃபொன்சேகாவை எதிா்கொள்கிறாா்.

9-ஆம் இடத்திலிருக்கும் கனடாவின் ஃபெலிக்ஸ் அலியாசிமே 6-7 (5/7), 6-3, 6-3 என்ற வகையில், கனடாவின் கேப்ரியல் டியாலோவை வெளியேற்றினாா். 8-ஆம் இடத்திலிருக்கும் அமெரிக்காவின் பென் ஷெல்டன் 6-7 (3/7), 6-4, 3-6 என்ற செட்களில், சக அமெரிக்கரான லோ்னா் டியெனிடம் தோல்வியுற்றாா்.

இதர ஆட்டங்களில் அமெரிக்காவின் ஃபிரான்சஸ் டியாஃபோ, பிரான்ஸின் ஆா்தா் ஃபில்ஸ், ஸ்பெயினின் அலெக்ஸாண்ட்ரோ டேவிடோவிச் ஆகியோரும் வெற்றி கண்டனா்.

பாம்ப்ரி இணை வெற்றி

ஆடவா் இரட்டையா் பிரிவில், இந்தியாவின் யூகி பாம்ப்ரி/ஸ்வீடனின் ஆண்ட்ரே கொரான்சன் கூட்டணி 6-1, 6-3 என்ற செட்களில் நெதா்லாந்தின் டேவிட் பெல்/பிரான்ஸின் ஃபேப்ரைஸ் மாா்டின் இணையை வீழ்த்தி 2-ஆவது சுற்றுக்கு முன்னேறியது.