சென்னையில் 18 ஆண்டுகளாக ஆக்கிரமிக்கப்பட்டிருந்த திருவண்ணாமலை அருணாசலேஸ்வரர் கோயிலுக்குச் சொந்தமான ரூ.50 கோடியிலான நிலத்தை அறநிலையத் துறை அதிகாரிகள் வெள்ளிக்கிழமை அதிரடியாக மீட்டனர்.

திருவண்ணாமலை அருணாசலேஸ்வரர் கோயிக்குச் சொந்தமாக தமிழகத்தின் பல்வேறு பகுதிகளில் பல கோடி மதிப்புள்ள நிலங்கள், கட்டடங்கள் உள்பட அசையும், அசையா சொத்துக்கள் உள்ளன.

அந்த வகையில், சென்னை அடையாறு பெசன்ட் அவென்யூ சாலை கதவு எண் 42-ல் (அடையாறு பிளாக்-5, நகர புல எண் 2) 11 கிரவுண்ட் நிலம் உள்ளது. அருணாசலேஸ்வரர் கோயிலுக்குச் சொந்தமான இந்த இடத்தின் தற்போதைய மதிப்பு ரூ.50 கோடி.

இங்கு சென்னையைச் சேர்ந்த பாலாஜி 18 ஆண்டுகளுக்கு முன்பு ஸ்ரீகுழந்தை அங்காளம்மன் கோயிலை கட்டியுள்ளார். இந்த ஆக்கிரமிப்பை அருணாசலேஸ்வரர் கோயில் அதிகாரிகள் கவனிக்கவில்லை. இதனால், இந்தக் கோயில் தனக்குச் சொந்தமான இடத்தில் கட்டப்பட்டுள்ளது என்று பக்தர்களை நம்ப வைத்து கோயிலில் பூஜைகள், விழாக்களை பாலாஜி நடத்தி வந்துள்ளார்.

ரூ.50 கோடி சொத்து மீட்பு: இந்த நிலையில், சென்னை அடையாறில் உள்ள அருணாசலேஸ்வரர் கோயிலுக்குச் சொந்தமான சொத்துகளை நிர்வகித்து, பணம் வசூலிக்க நியமிக்கப்பட்ட கோயில் ஊழியரும், எழுத்தருமான மு.தியாகராஜன் இந்த ஆக்கிரமிப்பு சொத்து குறித்து கோயில் இணை ஆணையர் இரா.ஜெகந்நாதனிடம் தெரிவித்தார்.

இதையடுத்து, அதிகாரிகள் துணையுடன் இந்த நிலத்தை இணை ஆணையர் மீட்டார்.
 கட்டடங்கள் இடிப்பு: மேலும், ஆக்கிரமிப்பு இடத்தில் கட்டப்பட்டிருந்த கோயில் கட்டடங்களை இணை ஆணையர் இரா.ஜெகந்நாதன், சென்னை இந்து சமய அறநிலையத் துறை உதவி ஆணையர் பா.விஜயா, கோயில் உதவிச் செயற்பொறியாளர் பொன்.கல்யாணசுந்தரம் ஆகியோர் வெள்ளிக்கிழமை இடித்து அகற்றினர். பின்னர், கோயிலுக்குச் சொந்தமான 11 கிரவுண்ட் நிலத்தையும் முழுமையாக அதிகாரிகள் தங்கள் வசம் கொண்டு வந்தனர்.