கோபி முன்னாள் நகர்மன்றத் தலைவரும், சுதந்திர போராட்டத் தியாகியுமான ஜி.எஸ்.லட்சுமணன் சிலை திறப்பு விழாவில் பங்கேற்பதற்காகத் தமிழக ஆளுநர் பன்வாரிலால் புரோஹித் புதன்கிழமை (ஆகஸ்ட் 29) கோபிக்கு வருகிறார்.
 கோபிசெட்டிபாளையம் நகரில் வாய்க்கால் ரோட்டில் டி.எஸ்.ராமன்-சரோஜினி தேவி விடுதிகள் உள்ளன. இந்த விடுதியை கோபி முன்னாள் நகர்மன்றத் தலைவரும், சுதந்திர போராட்டத் தியாகியுமான ஜி.எஸ்.லட்சுமணன் நிறுவினார்.
 இங்கு படித்த முன்னாள் மாணவர்கள் பேரவை சார்பில் இந்த விடுதியில் ஜி.எஸ்.லட்சுமணன் சிலை அமைக்கப்பட்டுள்ளது.
 இந்த சிலை திறப்பு விழா புதன்கிழமை (ஆகஸ்ட் 29) காலை 10 மணிக்கு தமிழக கல்வித்துறை அமைச்சர் கே.ஏ.செங்கோட்டையன் முன்னிலையில் நடைபெற உள்ளது. விழாவில் சிறப்பு விருந்தினராகத் தமிழக ஆளுநர் பன்வாரிலால் புரோஹித் கலந்து கொண்டு தியாகி ஜி.எஸ்.லட்சுமணன் உருவச் சிலையை திறந்து வைத்து சிறப்பரையாற்ற உள்ளார். மேலும், தியாகி ஜி.எஸ்.லட்சுமணன் நினைவாக சிறந்த சமூக சேவை ஆற்றியோருக்கு விருதுகளைஆளுநர் வழங்குகிறார்.
 விழாவில், தில்லி அகில இந்திய ஹரிஜன் சேவக் சங்கத் தலைவர் சங்கர்குமார் சன்யால், கோபி ஹரிஜன் சேவக் சங்கத் தலைவர் கே.எம்.வெங்கடேஸ்வரன், தமிழ்நாடு ஹரிஜன் சேவக் சங்கத் தலைவர் பி.மாருதி உள்பட பலர் பங்கேற்க உள்ளனர்.