தேர்தல் பிரசாரத்துக்காக புதுவை முதல்வர் மேகாலயா பயணம்

மேகாலயா சட்டப்பேரவைத் தேர்தலையொட்டி, காங்கிரஸ் கட்சி சார்பில் பிரசாரம் மேற்கொள்வதற்காக, புதுவை முதல்வர் வே.நாராயணசாமி அந்த மாநிலத்துக்கு ஞாயிற்றுக்கிழமை புறப்பட்டுச் சென்றார்.

காங்கிரஸ் ஆட்சி நடைபெறும் மேகாலயாவில் சட்டப்பேரவைத் தேர்தல் வருகிற பிப்.27-ஆம் தேதி நடைபெற உள்ளது. இதையொட்டி, அங்கு பிரசாரப் பணிகளில் ஈடுபட புதுவை முதல்வர் நாராயணசாமிக்கு காங்கிரஸ் தலைவர் ராகுல்காந்தி உத்தரவிட்டுள்ளார். இதையடுத்து முதல்வர் நாராயணசாமி மேகாலயாவில் 3 நாள் பிரசாரம் மேற்கொள்ள ஞாயிற்றுக்கிழமை புறப்பட்டுச் சென்றார்.

பிற்பகலில் மேகாலயா சென்றடைந்த அவர், பிரசாரப் பணிகளை உடனடியாகத் தொடங்கினார்.

செவ்வாய்க்கிழமை வரை பல்வேறு பிரசாரப் பொதுக்கூட்டங்களில் அவர் பங்கேற்க உள்ளார். அன்றிரவே முதல்வர் நாராயணசாமி புதுச்சேரி திரும்புகிறார்.