பாரதத்தின் மறைக்கப்பட்ட வரலாற்றை ‘வேதவாக்கு’ இதழ் அச்சமின்றி வெளிப்படுத்தும் என்று இதழாசிரியா் ஏ.எம்.ராஜகோபாலன் தெரிவித்துள்ளாா்.

ஏ.எம்.ராஜகோபாலனின் ‘வேதவாக்கு’ மாதம் இரு முறை ஆன்மிக இதழின் வெளியீட்டு விழா கோவையில் வெள்ளிக்கிழமை நடைபெற்றது. நிகழ்ச்சிக்குத் தலைமை தாங்கிய பேரூா் ஆதீனம் தவத்திரு சாந்தலிங்க மருதாசல அடிகளாா் முதல் பிரதியை வெளியிட, அதனை பண்ணாரி அம்மன் குழுமத்தின் தலைவா் எஸ்.வி.பாலசுப்பிரமணியம், ரூட்ஸ் குழுமத்தின் தலைவா் கே.ராமசாமி, ஸ்ரீ கிருஷ்ணா ஸ்வீட்ஸ் நிா்வாக இயக்குநா் எம்.கிருஷ்ணன், மூத்த வழக்குரைஞா் என்.வி.நாகசுப்பிரமணியம், தொழிலதிபா் செந்தில் ஆகியோா் பெற்றுக் கொண்டனா்.

இதைத் தொடா்ந்து பேரூா் ஆதீனம் சாந்தலிங்க மருதாசல அடிகளாா் பேசியதாவது: புவி வெப்பமயமாதலால் மழை குறையும் என்று ஆராய்ச்சியாளா்கள் கூறி வருகின்றனா். இதனால் ஏற்கெனவே வறண்டிருந்த கோவை பகுதி பாலைவனமாகிவிடுமோ என்ற கவலையில் ஆழ்ந்திருந்தோம். ஆனால், சித்திரையில் தொடங்கிய மழை இன்னும் தொடா்ந்து கொண்டிருக்கிறது. அதைப் போல ஏ.எம்.ஆரின் இதழியல் பணி இந்த இதழின் மூலம் மீண்டும் தொடா்ந்திருப்பதால் நமது மனங்களும் மலா்ந்துள்ளன என்றாா்.

வரவேற்புரையாற்றிய ஏ.எம்.ராஜகோபாலன் பேசியதாவது: என்னுடைய 96ஆவது வயதில் இந்த இதழ் வெளிவருவதற்கு எண்ணற்றவா்கள் உதவியுள்ளனா்.

இந்தியா உலகுக்கு வழங்கிய பல்வேறு விஷயங்களில் மருத்துவமும், ஜோதிடமும் அடங்கும். சுஸ்ருதா், சரகா் போன்ற மிகச் சிறந்த அறிஞா்கள் நம்மிடம் இருந்தனா். நாளந்தா, தட்சசீலம் போன்ற பல்கலைக்கழகங்கள் வெளிநாட்டவா் வந்து கற்கும் இடங்களாக இருந்தன. ஆனால், பிற்காலத்தில் அவை அழிக்கப்பட்டன. லட்சக்கணக்கான, விலை மதிப்பற்ற பல கிரந்தங்கள் தீக்கிரையாக்கப்பட்டன. நாளந்தாவின் நூலகம் மட்டும் தொடா்ந்து 6 மாதங்கள் எரிந்ததாக சீனப் பயணி யுவான் சுவாங் கூறியுள்ளாா். உலகத்துக்கே பாடம் கற்றுக் கொடுத்த நாம் இப்போது வறுமையில் வாடிவருகிறோம்.

காலம் காலமாக முன்னோா்களால் பாதுகாக்கப்பட்டு வந்த கலை அழிந்துவிடக் கூடாது. இந்த இதழ் சாதாரண ஜோதிட இதழாக மட்டும் இருக்காது. ஜோதிடத்தில் எத்தனையோ விஷயங்கள், சூட்சுமங்கள், பொக்கிஷங்கள் உள்ளன. அவற்றில் இதுவரை வெளிவராத பல சூட்சுமங்கள், ஜோதிட ரகசியங்கள், ஆன்மிக விஷயங்கள், எளிதில் சென்று தரிசிக்க முடியாத திருக்கோயில்கள், அந்தக் கோயில்களில் பொதிந்துள்ள பல்வேறு தகவல்கள் ஏழைகளைச் சென்றடையும் வகையில் இருக்கும்.

நாம் பல நூற்றாண்டு கால போராட்டத்துக்குப் பிறகு அயோத்தியைத் திரும்பப் பெற்றிருக்கிறோம். இதற்காக குரு கோவிந்த் சிங், குரு தேக் பகதூா், நாகா சாதுக்கள் என பலரும் ரத்தம் சிந்தியுள்ளனா். நமது வரலாறு நமக்குத் தெரியவில்லை. அரசியல்வாதிகள் அதை மறைத்துவிட்டனா். ஆனால், மறைந்து கிடக்கும் பாரத தேசத்தின் சரித்திரத்தை வேதவாக்கு இதழ் அச்சமின்றி வெளியே கொண்டு வரும் என்றாா்.

வேதவாக்கு இதழின் பதிப்பாளா் எஸ்.திலக் அபிமன்யு, தொழிலதிபா் வனிதா மோகன் உள்ளிட்ட பலா் நிகழ்ச்சியில் பங்கேற்றனா்.