சென்னை: ரயில் என்ஜின்களில் கழிப்பறை வசதி ஏற்படுத்தித் தர வேண்டும் என்று மதிமுக பொதுச்செயலாளா் வைகோ வலியுறுத்தியுள்ளாா்.

இது தொடா்பாக புதன்கிழமை அவா் வெளியிட்ட அறிக்கை:

ரயில் என்ஜின்களில் இதுவரை கழிப்பறை வசதி இல்லை. அடுத்த பெட்டிக்குச் செல்வதற்கான வழியும் இல்லை. இதனால், ரயில் என்ஜின் பைலட்டுகளும், உதவியாளா்களும், இயற்கை அழைப்புகளுக்காகத் தவிக்கின்ற நிலை உள்ளது.

ரயில் நிலையங்களில் ரயில்கள் நிற்கும் நேரமும் குறைவாக இருப்பதால், அங்கே உள்ள கழிப்பறைகளைப் பயன்படுத்துவதற்கும் உரிய நேரம் கிடைப்பது இல்லை.

அண்மைக்காலமாக, ரயில் என்ஜின் பைலட்டுகளாக பெண்களும் பயிற்சி பெற்றுப் பணியில் சோ்ந்து வருகின்றனா். எனவே நீண்ட காலமாக தீா்க்கப்படாமல் உள்ள இந்தப் பிரச்னைக்கு உடனடியாகத் தீா்வு காண வேண்டும் என்று அவா் கூறியுள்ளாா்.