பாலியல் தொடா்பான வழக்குகளில் இரு மாதங்களுக்குள் தீா்ப்பு வழங்குவதை உறுதி செய்ய வேண்டும் என பாமக இளைஞரணித் தலைவா் அன்புமணி ராமதாஸ் வலியுறுத்தியுள்ளாா்.

இது தொடா்பாக ஞாயிற்றுக்கிழமை அவா் வெளியிட்ட அறிக்கை: வெண்ணெய்மலை தனியாா் பள்ளி மாணவி பாலியல் வன்கொடுமைக்கு உள்ளாக்கப்பட்டதால் தற்கொலை செய்து கொண்டது மிகவும் வேதனையளிக்கிறது. அவரது குடும்பத்தினருக்கு ஆழ்ந்த இரங்கல். இந்த விவகாரத்தில் குற்றவாளி யாராக இருந்தாலும் கடுமையான தண்டனை பெற்றுத் தர வேண்டும்.

கோவை, கரூா், திண்டுக்கல், சென்னை என கல்விக்கூடங்களில் மாணவிகளுக்கு பாலியல் தொல்லைகள் தொடா்ந்து கொண்டிருக்கின்றன. என்ன செய்தாலும் சட்டத்தின் ஓட்டைகள் வழியாக தப்பித்துக் கொள்ளலாம் என்ற எண்ணமே இதற்கு காரணம். இதை மாற்ற வேண்டும்.

பாலியல் குற்றவாளிகளுக்கான தண்டனைகள் அதிகரிக்கப்பட்டுள்ளன. ஆனால், நீதி வழங்குவதில் தான் தாமதம் ஏற்படுகிறது. இத்தகைய குற்றங்களில் அதிகபட்சமாக இரு மாதங்களில் விசாரணையை முடித்து தீா்ப்பு வழங்கப்படுவது உறுதி செய்யப்பட வேண்டும் என அன்புமணி கூறியுள்ளாா்.