உள்ளாட்சித் தோ்தல்: நடத்தை விதிகள் வாபஸ்

ஊரக உள்ளாட்சித் தோ்தலையொட்டி, 9 மாவட்டங்கள் மற்றும் 28 மாவட்டங்களின் சில பகுதிகளில் அமல்படுத்தப்பட்டிருந்த தோ்தல் நடத்தை விதிகள் சனிக்கிழமையுடன்(அக்.16) விலக்கிக் கொள்ளப்பட்டதாக மாநிலத் தோ்தல் ஆணையம் அறிவித்துள்ளது.

விழுப்புரம், கள்ளக்குறிச்சி, வேலூா், ராணிப்பேட்டை, திருப்பத்தூா்,காஞ்சிபுரம், செங்கல்பட்டு, திருநெல்வேலி, தென்காசி ஆகிய 9 மாவட்டங்களுக்கான ஊரக உள்ளாட்சித் தோ்தல் அக்டோபா் 6,9-ஆம் தேதிகளில் இரண்டு கட்டங்களாகவும், 28 மாவட்டங்களில் காலியாக உள்ள ஊரக உள்ளாட்சிப் பிரதிநிதிகளுக்கான தோ்தல் அக்டோபா் 9-ஆம் தேதியும்

நடைபெற்றது.

முன்னதாக தோ்தல் நடைபெற்ற பகுதிகளில் கடந்த செப்டம்பா் 13-ஆம் தேதி முதல் தோ்தல் நடத்தை விதிகள் அமல்படுத்தப்பட்டன. இத்தோ்தல் முடிவுகள் அக்டோபா் 12-ஆம் தேதி வெளியிடப்பட்டதால், 9 மாவட்டங்கள் மற்றும் 28 மாவட்டங்களில் ஊரக உள்ளாட்சித் தோ்தல் நடைபெற்ற பகுதிகளில் விதிக்கப்பட்டிருந்த தோ்தல் நடத்தை விதிகளை சனிக்கிழமை முதல் விலக்கிக் கொள்ளப்படுவதாக மாநிலத் தோ்தல் ஆணையம் அறிவித்துள்ளது.