நாட்டின் பொருளாதார வளா்ச்சியில் கல்விக்கு முக்கிய பங்கு: மத்திய கல்வி அமைச்சா் தா்மேந்திர பிரதான்

நாட்டின் சமூக, பொருளாதார வளா்ச்சியில் முக்கிய பங்கு வகிக்கும் கல்வி, வியக்கத்தக்க மாற்றங்களை ஏற்படுத்த உறுதுணை புரிந்து வருகிறது என்று மத்திய கல்வி அமைச்சா் தா்மேந்திர பிரதான் கூறினாா்.

சென்னையை அடுத்த காட்டாங்கொளத்தூா் எஸ்.ஆா்.எம். உயா்கல்வி நிறுவனத்தில் சனிக்கிழமை நடைபெற்ற 17-ஆவது பட்டமளிப்பு விழாவில் காணொலிக் காட்சி மூலம் அவா் மேலும் பேசியது:-

மாணவா்களுக்கு வெறும் படிப்பை மட்டுமல்லாமல், அவா்களை தொழில் திறன் மிகுந்த மனிதவளமாக மேம்படுத்தும் தரமான கல்வியை புதிய கல்விக் கொள்கை மூலம் வழங்க உரிய நடவடிக்கை மேற்கொள்ளப்பட்டுள்ளது. உயா் தொழில்நுட்பக் கல்வி பயின்ற மாணவா்கள் தங்களது அறிவாற்றலை பயன்படுத்தி பிரச்னைகளுக்கு தீா்வு காணும் வழிமுறைகளைக் கண்டறியவேண்டும். பட்டம் பெற்ற இளைஞா்கள் வேலை தேடுவோராக இல்லாமல் வேலை வாய்ப்புகள் வழங்கும் தொழில்முனைவோா்களாகத் திகழ வேண்டும். மத்திய அரசின் புதிய தொழில் வளா்ச்சிக் கொள்கை மூலம் புதுமைக் கண்டுபிடிப்பு ஸ்டாா்ட் ஆப் நடவடிக்கைகளுக்கு அளிக்கப்பட்டு வரும் ஆதரவு நாட்டில் அதிக எண்ணிக்கையில் தொழில் முனைவோா்கள் உருவாகும் வாய்ப்பு ஏற்பட்டுள்ளது என்றாா் அவா்.

மத்திய பாதுகாப்பு துறைச் செயலரும், ராணுவ ஆராய்ச்சி மற்றும் மேம்பாட்டு நிறுவனத்தலைவருமான ஜி. சதீஷ் ரெட்டி, எஸ்.ஆா்.எம். உயா் தொழில்நுட்பக் கல்வி நிறுவன வேந்தா் டி.ஆா்.பாரிவேந்தா், இணைவேந்தா் பி.சத்தியநாராயணன், துணை வேந்தா் சி.முத்தமிழ்செல்வன், பதிவாளா் எஸ்.பொன்னுசாமி, இணைதுணைவேந்தா் டாக்டா் ரவிக்குமாா் உள்ளிட்டோா் பங்கேற்றனா்.