சென்னை:சென்னை அண்ணா சாலையில், முன்னாள் முதல்வர் கருணாநிதிக்கு சிலை அமைக்கப்படும் என்று தமிழக சட்டப்பேரவையில் முதல்வர் மு.க. ஸ்டாலின் அறிவித்தார்.

தஞ்சாவூர் சட்டமன்ற உறுப்பினர் நீலமேகம் கேள்விக்கு தமிழக சட்டப்பேரவையில் இன்று பதிலளித்த தமிழக முதல்வர் மு.க. ஸ்டாலின், அண்ணா சாலையில் முன்னாள் முதல்வர் கருணாநிதியின் சிலையை அமைக்க பல்வேறு தரப்பினரும் கோரியிருந்ததாகவும், சட்ட வல்லுநர்களுடன் கலந்தாலோசனை செய்து, சென்னை அண்ணா சாலையில் ஏதாவது ஒரு இடத்தில் சிலை அமைக்கப்படும் என்றும் அறிவித்தார்.

மேலும், அண்ணா சாலையில் போக்குவரத்துக்கு இடையூறு இல்லாமல் கருணாநிதிக்கு சிலை வைக்கப்படும் என்றும் கூறினார்.

சென்னை அண்ணா சாலையில், பெரியார், அண்ணா, எம்ஜிஆர் உள்ளிட்ட அரசியல் தலைவர்களின் சிலைகள் இடம்பெற்றுள்ள நிலையில், ஸ்டாலின் இந்த அறிவிப்பை வெளியிட்டுள்ளார்.