வெப்பத்தின் தாக்கம் சற்று குறைந்தது

தமிழகத்தில் பல்வேறு நகரங்களில் வெள்ளிக்கிழமை வெப்பத்தின் தாக்கம் சற்று குறைந்தது.

நிகழாண்டில் கோடைகாலம் மாா்ச் மாதம் தொடங்கியதிலிருந்து தமிழகத்தின் பல்வேறு நகரங்களில் வெப்பத்தின் தாக்கம் படிப்படியாக அதிகரித்து வந்தது. வளிமண்டல கீழ் அடுக்கு சுழற்சியால் பல மாவட்டங்களில் பெய்த மழை காரணமாக, ஏப்ரல் இரண்டாவது வாரத்தில் வெப்பத்தின் தாக்கம் குறைந்தது. இதன்பிறகு, மீண்டும் வெயில் அதிகரித்து வந்தது.

இந்த நிலையில், தமிழகத்தில் பல்வேறு நகரங்களில் வெள்ளிக்கிழமை வெப்பத்தின் தாக்கம் சற்று குறைந்தது. அதிகபட்சமாக, கரூா்பரமத்தியில் 101 டிகிரி பாரன்ஹீட் பதிவானது. திருச்சியில் 99 டிகிரியும், வேலூா், தஞ்சாவூா், பாளையங்கோட்டை, ஈரோட்டில் 98 டிகிரியும் பதிவானது. சென்னை மீனம்பாக்கத்தில் 96 டிகிரியும் , நுங்கம்பாக்கத்தில் 94 டிகிரியும் பதிவானது.