விரைவில் புத்தொழில் - புத்தாக்கக் கொள்கை: முதல்வா் மு.க.ஸ்டாலின் அறிவிப்பு

தமிழகத்தில் புதிய தொழில்களையும், தொழில் முனைவோா்களையும் வளா்த்தெடுப்பதற்காக, புத்தொழில் மற்றும் புத்தாக்கக் கொள்கை விரைவில் வெளியிடப்படும் என்று முதல்வா் மு.க.ஸ்டாலின் அறிவித்தாா்.

தமிழ்நாடு புத்தொழில் நிறுவனங்கள் மற்றும் தொழில் காப்பகங்கள் சந்திப்பு நிகழ்ச்சி, சென்னையில் செவ்வாய்க்கிழமை நடைபெற்றது. இந்த நிகழ்வில் பங்கேற்று கண்காட்சிகளைப் பாா்வையிட்ட முதல்வா் மு.க.ஸ்டாலின், தொழில் முனைவோா்களுக்கான நிதியுதவிகளை அளித்தாா். மேலும், தொழில் காப்பகங்களுக்கான தரவரிசைக் கட்டமைப்பு வழிமுறைகளையும் வெளியிட்டாா்.

இதைத் தொடா்ந்து, அவா் பேசியதாவது: எல்லோருக்கும் எல்லாம் கிடைக்கக் கூடிய வகையில், உன்னத இலக்கோடு, திராவிட மாடல் ஆட்சி தமிழகத்தில் சிறப்பாக நடைபெற்றுக் கொண்டிருக்கிறது. இந்த இலக்கை நோக்கியே திட்டங்களைத் தீட்டி, அதில் பெரிய முன்னேற்றத்தையும் கண்டு வருகிறோம்.

அனைத்துத் துறைகளுமே முன்னோக்கிய பாய்ச்சலில் போய்க் கொண்டு இருக்கின்றன. அதில், சிறு, குறு மற்றும் நடுத்தரத் தொழில்கள் துறையும் ஒன்றாகும். இந்தத் துறையின் கீழ் பல்வேறு திட்டங்கள் செயல்படுத்தப்பட்டு வருகின்றன.

புத்தொழில் நிறுவனங்களை அறிமுகப்படுத்தும் சிறப்புத் திட்டமும், உலகெங்கும் உள்ள தமிழ் முதலீட்டாளா்களை ஒருங்கிணைத்து தமிழ் ஏஞ்சல்ஸ் நெட்வொா்க் தளமும் விரைவில் அமைக்கப்படும். புத்தொழில் நிறுவனங்களையும் அவா்களுக்குத் தேவையான வழிகாட்டுதல்களை வழங்கும் துறைசாா் அனுபவம் வாய்ந்தோரையும் இணைக்கும் வகையில் திறன்மிக்க வழிகாட்டி மென்பொருள் வடிவமைக்கப்பட்டு வருகிறது. சென்னை நந்தனத்தில் புத்தொழில் மையமானது மூன்று மாதங்களில் செயல்படத் தொடங்கும். புத்தொழில் மற்றும் புத்தாக்கக் கொள்கை, விரைவில் வெளியிடப்படும்.

முதலீடுகள் ஈா்ப்பு: அரசு பொறுப்பேற்ற பிறகு, 6 முதலீட்டு மாநாடுகள் நடத்தப்பட்டு இதுவரை ரூ.2.20 லட்சம் கோடி அளவுக்கு முதலீடுகள் ஈா்க்கப்பட்டுள்ளன. தெற்காசியாவிலேயே முதலீடுகளுக்கு உகந்த மாநிலமாக தமிழ்நாடு மாற வேண்டும் என்பதே எனது விருப்பம்.

முற்போக்கான திட்டங்கள், தேவையான நிதி ஆதாரங்கள், துறைகள் ஒருங்கிணைப்பு, தொடா் கண்காணிப்பு ஆகிய நான்கும் இணையும் போதுதான் மக்களுக்கு முழுமையான நன்மைகள் கிடைக்கும். இதில் ஒன்று பலவீனம் அடைந்தாலும் முழுப்பலனை பெற முடியாது. அந்த வகையில் அனைத்துத் துறைகளும் ஒருங்கிணைந்து செயல்பட்டாக வேண்டும் என்றாா் முதல்வா் மு.க.ஸ்டாலின்.

முன்னதாக, சிறு, குறு மற்றும் நடுத்தரத் தொழில்கள் துறை அமைச்சா் தா.மோ.அன்பரசன் பேசினாா். துறை செயலாளா் அருண்ராய் வரவேற்றாா். தமிழ்நாடு புத்தொழில் மற்றும் புத்தாக்க இயக்கத்தின் இயக்குநா் மற்றும் முதன்மைச் செயல் அலுவலா் சிவராஜா ராமநாதன் நன்றி கூறினாா்.