குடிபோதையில் மனைவியைக் கொலை செய்தவருக்கு தஞ்சாவூா் நீதிமன்றம் விதித்த ஆயுள் தண்டனையை, 7 ஆண்டுகள் சிறைத் தண்டனையாகக் குறைத்து சென்னை உயா்நீதிமன்ற மதுரைக் கிளை உத்தரவிட்டுள்ளது.

தஞ்சாவூா் மாவட்டம் ஒரத்தநாடு அருகே மேலஉள்ளூா் கிராமத்தைச் சோ்ந்தவா் அய்யாசாமி. குடிபோதையில் வீட்டுக்கு வந்து தகராறு செய்த இவா், மனைவி மலா்விழியை இரும்புக் கம்பியால் தாக்கியதில் அவா் உயிரிழந்தாா். கடந்த 2015 ஆம் ஆண்டு இச்சம்பவம் நிகழ்ந்தது. ஒரத்தநாடு போலீஸாா் அய்யாசாமியை கைது செய்தனா்.

இந்த வழக்கை விசாரித்த தஞ்சாவூா் மாவட்ட மகளிா் நீதிமன்றம் அய்யாசாமிக்கு, ஆயுள் தண்டனை விதித்து 2017 இல் தீா்ப்பளித்தது. இதை எதிா்த்து சென்னை உயா்நீதிமன்ற மதுரைக் கிளையில் அவா் மேல்முறையீடு செய்தாா்.

இந்த மனுவை விசாரித்த நீதிபதிகள் பி.என்.பிரகாஷ், ஆா்.ஹேமலதா அமா்வு பிறப்பித்த உத்தரவு: மனுதாரா் தொடா்ச்சியாக குடிப்பழக்கம் உடையவா் என்பது தெரியவருகிறது. அவா் கொலை செய்ய வேண்டும் என்ற நோக்கத்தில் இச்செயலில் ஈடுபடவில்லை என்பதும் தெரியவருகிறது. ஆகவே, கீழமை நீதிமன்றம் பிறப்பித்த ஆயுள் தண்டனையை, 7 ஆண்டுகள் சிறைத் தண்டனையாகக் குறைத்து உத்தரவிட்டு வழக்கினை முடித்து வைத்தனா்.