முதலமைச்சா் அழைப்பு மையத்தில் முதல்வா் ஸ்டாலின் திடீா் ஆய்வு: மக்களின் கோரிக்கைகளை கேட்டறிந்தாா்

முதலமைச்சரின் அழைப்பு மையத்தில் முதல்வா் மு.க.ஸ்டாலின் செவ்வாய்க்கிழமை திடீரென ஆய்வு மேற்கொண்டாா். அப்போது, பொதுமக்களின் தொலைபேசி அழைப்புகளை ஏற்று, அவா்களது கோரிக்கைகளையும் முதல்வா் கேட்டறிந்தாா்.

பொதுமக்களின் மனுக்களுக்கு விரைந்து தீா்வு காணும் பொருட்டு ‘முதல்வரின் முகவரி’ என்ற புதிய துறை உருவாக்கப்பட்டுள்ளது. இதன் மூலம் ஏற்கெனவே நடைமுறையில் இருந்த முறைகள் மாற்றம் செய்யப்பட்டு, அனைத்து மனுக்களும், ஒருங்கிணைந்த குறைதீா்ப்பு மேலாண்மை அமைப்பில் மின்னணு முறையில் பதிவேற்றம் செய்யப்பட்டு நடவடிக்கைகள் மேற்கொள்ளப்பட்டு வருகின்றன.

மேலும், முக்கிய மாற்றமாக, முதல்வரின் தனிப்பிரிவில் பெறப்படும் மனுக்கள் மட்டுமல்லாது இணையதளம், தபால், சமூக வலைதளம் மற்றும் மாவட்டங்களில் மாவட்ட ஆட்சியா்கள் மூலம் பெறப்படும் திங்கள் தினக் கோரிக்கைகள், மக்கள் தொடா்பு முகாம்கள், அமைச்சா்கள், சட்டப்பேரவை உறுப்பினா்கள் என அனைத்து நிலைகளிலும் பெறப்படும் மனுக்களும் ஒருசேர இம்முறையில் பதிவேற்றம் செய்யப்படுகிறது. முதலமைச்சரின் உதவி அழைப்பு மையம் மற்றும் ஒருங்கிணைக்கப்பட்ட குறைதீா்வு மேலாண்மை திட்டத்தில் 2021 மே 7 முதல் இதுநாள்வரை 26,43,654 மனுக்களுக்குத் தீா்வு காணப்பட்டுள்ளது.

இந்த நிலையில், சோழிங்கநல்லூரில் செயல்படும் முதலமைச்சரின் உதவி அழைப்பு மையத்தை முதல்வா் மு.க.ஸ்டாலின் செவ்வாய்க்கிழமை பாா்வையிட்டு, பொதுமக்களின் மனுக்கள் மீது எடுக்கப்பட்ட நடவடிக்கைகள் குறித்து விரிவான ஆய்வு மேற்கொண்டாா். அப்போது, தொலைபேசி வழியாக வந்த அழைப்புகளை ஏற்று, பொது மக்களின் கோரிக்கைகளைக் கேட்டறிந்தாா்.

வீட்டுமனைப் பட்டா பெற்ற அடையாறு பகுதி பயனாளியிடமும், முதியோா் ஓய்வூதியம் பெற்ற ஈரோடு மாவட்ட பயனாளியிடமும் தொலைபேசி வாயிலாக முதல்வா் உரையாடினாா்.

குடும்ப அட்டை இடமாறுதல் கோரிய அம்பத்தூா், அயப்பாக்கத்தைச் சோ்ந்த பயனாளியிடம் பேசிய முதல்வா், அவருக்கு உடனடியாக குடும்ப அட்டை மாறுதல் செய்து வழங்கிட அலுவலா்களுக்கு உத்தரவிட்டாா். திருப்பூா் வடக்கு வட்டாட்சியரை தொலைபேசியில் தொடா்பு கொண்டு, முதலமைச்சரின் முகவரி துறையிலிருந்து பெறப்பட்ட மனுக்கள் மீது விரைவாக நடவடிக்கை எடுத்து தீா்வு கண்டதற்காக அவரைப் பாராட்டினாா்.

திருச்சி தொழிலாளா் நல உதவி ஆணையரை தொடா்பு கொண்டு பேசிய முதல்வா் பெறப்பட்ட மனுக்கள் மீது தாமதமின்றி விரைந்து நடவடிக்கை எடுத்து தீா்வு காண உத்தரவிட்டாா்.

முதலமைச்சரின் அழைப்பு மையத்தில் அதிக எண்ணிக்கையிலான அழைப்புகளை ஏற்று, கோரிக்கைகளை நிவா்த்தி செய்த பணியாளா்களை முதல்வா் பாராட்டினாா். பொதுமக்களிடமிருந்து பெறப்பட்டுள்ள மனுக்கள் மீது விரைவாகவும், உரிய முறையிலும் தீா்வு காண வேண்டும் என்று அலுவலா்களுக்கு அறிவுறுத்தினாா்.

ஆய்வின்போது குறு, சிறு மற்றும் நடுத்தர தொழில் நிறுவனங்கள் துறை அமைச்சா் தா.மோ. அன்பரசன், முதல்வரின் முகவரி துறையின் சிறப்பு அலுவலா் ஷில்பா பிரபாகா் சதீஷ், முதல்வரின் தனிப் பிரிவு தனி அலுவலா் ராம் பிரதீபன் மற்றும் உயா் அலுவலா்கள் உடனிருந்தனா்.