தேனி மாவட்டம், பழனிசெட்டிபட்டி பேரூராட்சித் தலைவர் பதவியை அதிமுக உறுப்பினர்கள் ஆதரவுடன் அமமுக கைப்பற்றியுள்ளது.

பழனிசெட்டிபட்டி பேரூராட்சியில் மொத்தம் 15 வார்டுகள் உள்ளது. இதில், திமுக 7 வார்டுகளிலும், அமமுக  வார்டு, அதிமுக 2 வார்டுகளில் வெற்றி பெற்றுள்ளது. இதில், திமுக சார்பில் பேரூராட்சித் தலைவர் பதவிக்கு 15-வது வார்டு உறுப்பினர் மு.பவானி போட்டியிட்டார். அவரை எதிர்த்து அமமுக சார்பில் 11-வது வார்டு உறுப்பினர் அ.மிதுன்சக்கரவர்த்தி போட்டியிட்டார்.

தேர்தலில் மொத்தமுள்ள 15 உறுப்பினர்களும் வாக்களித்தனர். இதில், அமமுக வேட்பாளர் அ.மிதுன்சக்கரவர்த்தி 8 வாக்குகள் பெற்று வெற்றி பெற்றதாக அறிவிக்கப்பட்டார்.

பேரூராட்சித் தலைவர் பதவிக்கான தேர்தலில் அதிமுக உறுப்பினர்கள் இருவரில், ஒருவர் திமுகவிற்கும், மற்றொருவர் அமமுகவிற்கும் ஆதரவளித்துள்ளதாக கூறப்பட்ட நிலையில், அமமுக வேட்பாளர் 8 வாக்குகளுடன் வெற்றி பெற்றிருப்பது அரசியல் வட்டாரத்தில் பரபரப்பை ஏற்படுத்தியுள்ளது.

இத்தேர்தலில் அதிமுக உறுப்பினர்கள் 2 பேரின் ஆதரவுடன் வெற்றி பெற்றிருப்பதாக அமமுக நிர்வாகிகள் கூறினர்.