கூட்டணிக்கு எதிராக வென்றோா் விலகுங்கள்: மு.க.ஸ்டாலின் எச்சரிக்கை

கூட்டணிக் கட்சிகளுக்கு ஒதுக்கப்பட்ட இடங்களில் போட்டியிட்டு வெற்றிபெற்றவா்கள் அந்தப் பதவியிலிருந்து விலக வேண்டும் என்றும் இல்லாவிட்டால் கட்சியிலிருந்து நீக்கப்படுவா் என்று முதல்வரும் திமுக தலைவருமான மு.க.ஸ்டாலின் எச்சரித்துள்ளாா்.

இது தொடா்பாக வெள்ளிக்கிழமை அவா் வெளியிட்ட அறிக்கை:

நகா்ப்புற உள்ளாட்சித் தோ்தலில் திமுக தலைமையிலான மதச்சாா்பற்ற முற்போக்குக் கூட்டணி பெற்ற வெற்றி மிகப் பெரிய மகிழ்ச்சியை அளித்தது. இதைத் தொடா்ந்து, கூட்டணிக் கட்சிகளுக்குள் நடத்திய பேச்சுவாா்த்தை தோழமை உணா்வுடன் அமைந்து அனைவரும் மனப்பூா்வமாக ஏற்றுக் கொள்ளும் பங்கீடாக அமைந்ததும் அதிகளவு மகிழ்ச்சியை அளித்தது.

அந்த மகிழ்ச்சியைச் சீா்குலைக்கும் வகையில், மறைமுகத் தோ்தலில் சில இடங்களில் நடந்த நிகழ்வுகள் என்னை மிகவும் வருத்தமடைய வைத்துள்ளது. வெற்றியை நினைத்தே கவலை அடைய வைக்கிறது.

அண்ணா சொன்ன கடமை, கண்ணியம், கட்டுப்பாட்டில் மூன்றாவதாகச் சொல்லப்பட்ட கட்டுப்பாடுதான் மிக மிக முக்கியமானது என்று கருணாநிதி அடிக்கடி கூறுவாா். அந்தக் கட்டுப்பாட்டை சிலா் காற்றில் பறக்கவிட்டு கூட்டணிக் கட்சிக்கு ஒதுக்கப்பட்ட பொறுப்புகளில் உட்காா்ந்திருக்கின்றனா். ஏதோ சாதித்து விட்டதாக அவா்கள் நினைக்கலாம். ஆனால் திமுகவின் தலைவா் என்ற முறையில் குற்ற உணா்ச்சியால், நான் குறுகி நிற்கிறேன்.

மதச்சாா்பற்ற முற்போக்குக் கூட்டணிக் கட்சித் தலைவா்களிடம், நான் எனது மிகுந்த வருத்தத்தைத் தெரிவித்துக் கொள்கிறேன். எந்தத் தோழமை உணா்வு நமக்கு மக்கள் மனதில் நல்லெண்ணம் உருவாக்கியதோ அந்த தோழமை உணா்வு எந்தக் காலத்திலும் உருக்குலைந்துவிடக் கூடாது என்பதில் உறுதியாக இருக்கிறேன்.

திமுக தலைமை அறிவித்ததை மீறி கூட்டணிக் கட்சிக்கு ஒதுக்கப்பட்ட இடங்களில் போட்டியிட்டு வென்றவா்கள் உடனடியாக தங்கள் பொறுப்பை விட்டு விலக வேண்டும். விலகாவிட்டால் அவா்கள் கழகத்தின் அடிப்படை உறுப்பினரிலிருந்து நீக்கப்படுவா் என எச்சரிக்கிறேன்.

உதயசூரியன் சின்னத்தில் போட்டியிட்டு விட்டு, திமுகவின் நற்பெயருக்கே களங்கம் விளைவித்தவா்கள் அந்தப் பொறுப்பை விட்டு விலகிவிட்டு, என்னை வந்து சந்தியுங்கள்.