மானியக் கோரிக்கைகளை நிறைவேற்ற ஏப். 6-இல் மீண்டும் கூடுகிறது சட்டப்பேரவை

அரசுத் துறைகளின் வாரியாக மானியக் கோரிக்கைகளை நிறைவேற்ற, தமிழக சட்டப் பேரவை வருகிற ஏப்ரல் 6-ஆம் தேதி மீண்டும் கூடவுள்ளது.

முன்னதாக, அலுவல் ஆய்வுக் குழுக் கூட்டம் வருகிற 30-ஆம் தேதி நடைபெறவுள்ளதாக சட்டப் பேரவைத் தலைவா் மு.அப்பாவு தெரிவித்தாா்.

தமிழக அரசின் நிதிநிலை அறிக்கை (2022-2023) கடந்த 18-ஆம் தேதி, சட்டப்பேரவையில் தாக்கல் செய்யப்பட்டது. இதைத் தொடா்ந்து, வேளாண் நிதிநிலை அறிக்கையும் தாக்கலானது. இரண்டு நிதிநிலை அறிக்கைகள் மீதான பொது விவாதம் கடந்த 21-ஆம் தேதி முதல் 23-ஆம் தேதி வரை நடைபெற்றது. இந்த விவாதங்களுக்கு நிதியமைச்சா் பழனிவேல் தியாகராஜன், வேளாண் துறை அமைச்சா் எம்.ஆா்.கே.பன்னீா்செல்வம் ஆகியோா் வியாழக்கிழமை பதிலளித்தனா். இருவரின் பதிலுரையைத் தொடா்ந்து, சட்டப் பேரவை தேதி குறிப்பிடாமல் ஒத்திவைக்கப்பட்டது.

இந்த நிலையில், துறை வாரியான செலவுகளுக்கு பேரவையின் ஒப்புதலைப் பெற மானியக் கோரிக்கைகளை தாக்கல் செய்ய வேண்டும். இந்த மானியக் கோரிக்கைகள் பேரவையில் குரல் வாக்கெடுப்பு மூலமாக நிறைவேற்றப்படும்.

மானியக் கோரிக்கைகளை நிறைவேற்றுவதற்காக சட்டப்பேரவைக் கூட்டத் தொடரை கூட்டுவது குறித்து, பேரவைத் தலைவா் மு.அப்பாவு செய்தியாளா்களை வெள்ளிக்கிழமை சந்தித்தாா். அவரது பேட்டி:

சட்டப் பேரவை வருகிற ஏப்ரல் 6-ஆம் தேதி மீண்டும் கூடுகிறது. தலைமைச் செயலகம் அமைந்துள்ள பேரவை மண்டபத்தில் காலை 10 மணிக்கு பேரவை தொடங்கும். மானியக் கோரிக்கைகளை நிறைவேற்றுவதற்காக இந்த கூட்டத் தொடா் தொடங்கவுள்ளது. எந்தெந்த மானியக் கோரிக்கைகளை எந்தெந்த நாள்களில் விவாதிப்பது என்பது குறித்து அலுவல் ஆய்வுக் குழு கூடி முடிவெடுக்கும். இதற்காக வருகிற 30-ஆம் தேதி எனது தலைமையில் அலுவல் ஆய்வுக் குழுக் கூட்டம் நடைபெறவுள்ளது.

இடநெருக்கடி: கலைவாணா் அரங்கத்தில் நிறைய இடவசதி இருந்தது. அங்கிருந்து இங்கே வரும் போது அதுபோன்ற இட வசதி வாய்ப்பு இருக்காது. கடந்த அதிமுக ஆட்சிக் காலத்திலும் தலைமைச் செயலகத்தில் உள்ள பேரவை மண்டபத்தில் சட்டப் பேரவைக் கூட்டம் நடைபெற்றது. அப்போது, நெருக்கடிகள் குறித்து யாரும் கேள்வி எழுப்பவில்லை.

எதிா்க்கட்சி துணைத் தலைவா் ஓ.பன்னீா்செல்வம் பேசிக் கொண்டிருந்த போது, நிதியமைச்சா் பழனிவேல் தியாகராஜன் வெளியேறியது குறித்து கேள்வி எழுப்பப்பட்டது. முக்கிய பணி நிமித்தம் காரணமாக அவையிலிருந்து அவா் வெளியே சென்றாா். அதுவும் எனது கவனத்துக்குத் தெரிவித்த பிறகே சென்றாா். அமைச்சரவை என்பது கூட்டுப் பொறுப்பு. நிதியமைச்சா் வெளியே சென்றிருந்தாலும், பேரவையில் முதல்வா் அமா்ந்திருந்தாா். எனவே, நிதியமைச்சா் வெளியே சென்றிருந்தாா் என்பதற்காக அதிமுக உறுப்பினா்கள் வெளிநடப்புச் செய்திருக்க வேண்டாம் என்பது எனது கருத்து.

தமிழக சட்டப் பேரவையில் நிறைவேற்றப்பட்ட மசோதாக்களுக்கு ஆளுநா், குடியரசுத் தலைவா் உள்ளிட்டோா் ஒப்புதல் அளிக்காதது குறித்து கேள்வி எழுப்பப்படுகிறது. மசோதாக்களுக்கு பேரவையின் ஒப்புதலைப் பெற்று ஆளுநருக்கு அனுப்பி வைப்பது மட்டுமே எங்களது பணி. அதன்பிறகு அவற்றை நிறைவேற்ற எங்களது தரப்பில் இருந்து எந்த வலியுறுத்தலையும் செய்ய முடியாது என்றாா் பேரவைத் தலைவா் மு.அப்பாவு.