அரசுக்கு நெருக்கடி கொடுக்க நினைப்பவா்களை இரும்புக்கரம் கொண்டு ஒடுக்க வேண்டும்: காவல் துறைக்கு முதல்வா் மு.க. ஸ்டாலின் அறிவுரை

தமிழக அரசுக்கு திட்டமிட்டு நெருக்கடி கொடுக்க நினைப்பவா்களை இரும்புக்கரம் கொண்டு ஒடுக்க வேண்டும் என முதல்வா் மு.க.ஸ்டாலின் காவல் துறைக்கு அறிவுரை வழங்கிப் பேசினாா்.

தமிழக காவல் துறை, தீயணைப்புத் துறை, சிறைத் துறை ஆகிய துறைகளைச் சோ்ந்த 322 பேருக்கு குடியரசுத் தலைவா் பதக்கங்கள், மத்திய உள்துறை அமைச்சா் பதக்கங்கள், தமிழ்நாடு முதல்வா் பதக்கங்கள் வழங்கும் விழா சென்னை எழும்பூா் ராஜரத்தினம் விளையாட்டரங்கில் வெள்ளிக்கிழமை நடைபெற்றது. இந்த விழாவில் பதக்கங்களை வழங்கி முதல்வா் மு.க.ஸ்டாலின் பேசியதாவது:

பதக்கங்கள் காவலா்களுக்கு கிடைக்கும் அங்கீகாரமாகும். பதக்கங்கள், வீரதீரச் செயல்களுக்காக மட்டுமல்ல, பண்பாட்டுக்கான பதக்கங்களாகவும் மாறவேண்டும். மக்களுடன் நண்பா்களாக இருக்கும் காவலா்களுக்கும் பதக்கங்கள் வழங்கப்பட வேண்டும். காவல்துறை மக்களோடு நெருக்கமானால்தான், குற்றங்கள் குறையும். மக்களிடமிருந்து காவல் துறை விலகி இருந்தால், குற்றங்கள் பெருகிவிடும். எனவே, ‘காவல்துறை நம் நண்பன்’ என்று சொல்லும் வகையில் காவலா்கள் செயல்பட வேண்டும்

தமிழக அரசின் ஒரு கை, நிா்வாகம் என்றால் இன்னொரு கை காவல்துறை ஆகும். காவல்துறை என்றாலே தண்டனையை வாங்கித் தரும் துறையாக மட்டும் நினைக்கிறாா்கள். காவல்துறை என்பது குற்றங்கள் நடக்காத வகையில் சூழ்நிலைகளை உருவாக்கித் தரும் துறையாக மாறவேண்டும்.

இரும்புக் கரம் கொண்டு அடக்க வேண்டும்: குற்றங்கள் எந்தச் சூழலிலும் நடைபெறாத ஒரு காலத்தை உருவாக்குவதற்கு காவல்துறை திட்டமிட வேண்டும். ஒரு காவலா் அல்லது ஒரு காவல் நிலையம் தனது கடமையைச் செய்யத் தவறும்போது, அது ஒட்டுமொத்தமாக காவல்துறைக்கே தலைக்குனிவை ஏற்படுத்துகிறது. எந்த ஒரு காவலராக இருந்தாலும், அவரது செயல் காவல் துறையை தலைநிமிர வைக்க வேண்டுமே தவிர, தலைக்குனிவை ஏற்படுத்திவிடக் கூடாது. அத்தகைய எச்சரிக்கை உணா்வு, காவலா்கள் அனைவருக்கும் இருக்குமானால், குற்றச் சம்பவங்களே நடைபெறாத மாநிலமாகத் தமிழகம் மாறும்.

காவல் துறையினா் எந்தச் சூழலிலும் பொதுமக்களுக்கு அச்சம் தரும் சம்பவங்கள் நடக்காமல் கவனித்துக் கொள்ள வேண்டும். அரசியல் ரீதியாகவோ, மதம் மற்றும் ஜாதி காரணமாகவோ வன்முறைகள் உருவாகாமல் பாா்த்துக் கொள்ள வேண்டும். இந்த அரசாங்கத்துக்கு திட்டமிட்டு நெருக்கடி ஏற்படுத்த நினைப்பவா்களை இரும்புக் கரம் கொண்டு அடக்க வேண்டும்.

அமைதியே முக்கியத்துவம்: ஒட்டு மொத்தமான அமைதிப் பதக்கத்தை தமிழகக் காவல்துறை பெறவேண்டுமென விரும்புகிறேன். அனைவருக்கும் எடுத்துக்காட்டான திராவிட மாடல் ஆட்சியை தமிழகத்தில் வழங்கி வருகிறோம். ‘அனைவரையும் உள்ளடக்கிய வளா்ச்சி - எல்லாருக்கும் எல்லாம்’ என்ற உன்னதமான தத்துவத்தின் அடிப்படையில் திட்டங்களைத் தீட்டி வருகிறோம். இவை அனைத்துக்கும் அடிப்படை அமைதிதான்.

ஆட்சி மாற்றம் ஏற்பட்ட பிறகு தமிழகத்தை நோக்கி புதிய தொழிற்சாலைகள் வருவதற்குக் காரணம், தமிழகம் அமைதிப்பூங்காவாக இருப்பதால்தான். புதிய ஒப்பந்தங்களும் கையெழுத்தாவது, தமிழகத்தில் சட்டத்தின் ஆட்சி நடைபெறுவதால்தான். அத்தகைய அமைதிச் சூழலை காக்க வேண்டும். அதற்கு குந்தகம் ஏற்படுத்தக்கூடிய எந்த ஒரு சிறு சம்பவமும் நடைபெறக் கூடாது.

ஊக்கத்தொகை உயா்த்தப்படும்: மக்களைக் காக்கும் கடமை காவல்துறைக்கு உள்ளது. அதேபோல, காவல்துறையினரை காக்கக்கூடிய கடமை அரசுக்கு இருக்கிறது. அதை மனதில் வைத்து காவல்துறையினருக்கு ஏராளமான திட்டங்களை கடந்த ஓராண்டில் அமல்படுத்தியுள்ளோம். புதிதாக அமைக்கப்பட்டுள்ள காவல் ஆணையத்தின் அறிக்கை கிடைத்தவுடன், அதன் கோரிக்கைகள் பரிசீலனை செய்யப்பட்டு, படிப்படியாக நிறைவேற்றப்படும். வீர தீர செயல் புரிந்த காவல் அதிகாரிகள், காவலா்கள் அல்லது வீர மரணம் அடைந்தவா்களின் குடும்பங்களுக்கு தமிழ்நாடு அரசால் வழங்கப்பட்டு வரும் முதல்வரின் வீரப் பதக்கங்களுக்கான ஊக்கத் தொகை மற்றும் சலுகைகள், மத்திய அரசு பதக்கங்களுக்கு வழங்கப்படும் ஊக்கக் தொகை, சலுகைகளுக்கு இணையாக வழங்கப்படும் என்றாா் அவா்.

முன்னதாக இந்த நிகழ்ச்சிக்கு தமிழக அரசின் உள்துறை கூடுதல் தலைமைச் செயலா் எஸ்.கே.பிரபாகா் தலைமை வகித்தாா். தமிழக காவல்துறையின் தலைமை இயக்குநா் சி.சைலேந்திரபாபு வரவேற்றுப் பேசினாா்.

நிகழ்ச்சிக்கு முன்னதாக காவல்துறையின் அணிவகுப்பு மரியாதையை முதல்வா் மு.க.ஸ்டாலின் ஏற்றுக் கொண்டாா்.

சிறைத் துறை டிஜிபி சுனில்குமாா் சிங், லஞ்ச ஒழிப்புத் துறை டிஜிபி ப.கந்தசாமி, தீயணைப்புத் துறை பிராஜ் கிஷோா் ரவி, சென்னை பெருநகர காவல் துறை ஆணையா் சங்கா் ஜிவால், டிஜிபிக்கள் ஏ.கே.விசுவநாதன்,ஜெயந்த்முரளி, சீமா அகா்வால், ஆபாஷ்குமாா் உள்ளிட்ட பலா் பங்கேற்றனா். நிகழ்ச்சியின் இறுதியில் காவலா்களின் கலை நிகழ்ச்சி நடைபெற்றது.