உறுப்பு தான நடவடிக்கைகளில் தமிழகம் முதலிடம்: அமைச்சா் மா.சுப்பிரமணியன்

உறுப்பு தான நடவடிக்கைகளில் நாட்டிலேயே தமிழகம் முதன்மை மாநிலமாக உள்ளதாக மக்கள் நல்வாழ்வுத் துறை அமைச்சா் மா.சுப்பிரமணியன் தெரிவித்தாா்.

முதலமைச்சரின் விரிவான மருத்துவக் காப்பீட்டுத் திட்டம் மற்றும் பிரதமரின் ஆரோக்கிய திட்டத்தின் நான்காம் ஆண்டு நிறைவு விழா மற்றும் உறுப்பு மாற்று விழிப்புணா்வு தின நிகழ்ச்சி சென்னை அண்ணாசாலையில் உள்ள ஓமந்தூராா் பல்நோக்கு மருத்துவமனையில் வெள்ளிக்கிழமை நடைபெற்றது. அந்நிகழ்வை தொடக்கி வைத்து அமைச்சா் மா.சுப்பிரமணியன் பேசியதாவது:

2018-ஆம் ஆண்டு செப்டம்பா் 23-ஆம் தேதி முதல் மத்திய அரசின் பிரதமரின் மக்கள் ஆரோக்கிய திட்டத்துடன், முதலமைச்சரின் விரிவான மருத்துவ காப்பீட்டுத் திட்டம் ஒருங்கிணைக்கப்பட்டு நான்கு ஆண்டுகள் நிறைவு பெற்றுள்ளன.

ஒருங்கிணைக்கப்பட்ட இத்திட்டத்தில் இப்போது 796 அரசு மருத்துவமனைகள், 937 தனியாா் மருத்துவமனைகள் என மொத்தம் 1,733 மருத்துவமனைகள் அங்கீகரிக்கப்பட்டுள்ளன. இத்திட்டத்தின் கீழ் 11 தொடா் சிகிச்சை முறைகள், 52 முழுமையான பரிசோதனைகள், 8 உயா் சிறப்பு சிகிச்சைகள் உட்பட 1,513 மருத்துவம் மற்றும் அறுவை சிகிச்சை முறைகள் அனுமதிக்கப்பட்டுள்ளன.

தமிழக அரசின் மூளைச் சாவு உறுப்பு மாற்று சிகிச்சை திட்டத்தை 2008-ஆம் ஆண்டு செப்டம்பா் 5-ஆம் தேதி அப்போதைய முதல்வா் கருணாநிதி தொடக்கி வைத்தாா். 2021-ஆம் ஆண்டு ஆகஸ்ட் 13-ஆம் தேதி ‘விடியல்’ என்னும் முழு தானியங்கி செயல்முறை அறிமுகம் செய்யப்பட்டு, இந்த தொழில்நுட்பத்தை பயன்படுத்தும் இந்தியாவின் முதல் மாநிலமாக தமிழகம் திகழ்கிறது. தானியங்கி செயலியின் மூலம் மே 2022 முதல் தற்போது வரை 67 உறுப்பு கொடையாளா்களின் 224 உறுப்புகள், இறுதி நிலை உறுப்பு செயலிழப்பு நோயாளிகளுக்கு வழங்கப்பட்டுள்ளது. அக்டோபா் 2008 முதல் தற்போது வரை 1,559 மொத்த உறுப்பு கொடையாளா்கள் மூலம், 5,687 உறுப்புகளும், 3,629 திசுக்களும் தானமாக பெறப்பட்டது. உறுப்பு தானம் மற்றும் உடலுறுப்பு மாற்று அறுவைச் சிகிச்சை அளிப்பதிலும், உறுப்பு தான விழிப்புணா்விலும் மற்றும் தானம் பெற்ற உறுப்புகளை பயன்படுத்துவதிலும் தமிழகம் முன்னிலை மாநிலமாக உள்ளது என்றாா் அவா்.

இந்நிகழ்வில் மக்கள் நல்வாழ்வுதுறைச் செயலாளா் ப.செந்தில்குமாா், தமிழ்நாடு சுகாதார அமைப்பு திட்ட இயக்குநா் உமா, மருத்துவக் கல்வி இயக்குநா் நாராயணபாபு, மருத்துவம் மற்றும் ஊரக நலப்பணிகள் இயக்குநா் சம்ஷத் பேகம், பொது சுகாதாரம் மற்றும் நோய்த் தடுப்பு மருந்துத் துறை இயக்குநா் செல்வவிநாயகம், தமிழ்நாடு உறுப்பு மாற்று ஆணையத்தின் உறுப்பின செயலாளா் காந்திமதி உள்ளிட்டோா் பங்கேற்றனா்.