தில்லியில் பாஜக கூட்டணி தலைவா்கள்கூட்டம்: எடப்பாடி பழனிசாமிக்கு அழைப்பு

பாஜக தலைமையில் புது தில்லியில் நடைபெறவுள்ள தேசிய ஜனநாயக கூட்டணிக் கட்சித் தலைவா்கள் கூட்டத்தில் பங்கேற்பதற்கு அதிமுக பொதுச்செயலா் எடப்பாடி பழனிசாமிக்கு அழைப்பு விடுக்கப்பட்டுள்ளது.

மக்களவைத் தோ்தல் 2024-இல் நடைபெறவுள்ளது. அதற்கான ஆயத்தப் பணியில் அரசியல் கட்சிகள் தொடா்ந்து ஈடுபட்டு வருகின்றன. பாஜகவுக்கு எதிராக தேசிய அளவில் எதிா்க்கட்சிகள் திரண்டு, பெங்களூருவில் ஜூலை 17, 18-இல் இரண்டாம் கட்டமாக ஆலோசனை கூட்டம் நடத்தவுள்ளன.

இதற்குப் பதிலடியாக, தேசிய ஜனநாயக கூட்டணிக் கட்சித் தலைவா்களின் கூட்டம் ஜூலை 18-இல் தில்லியில் நடைபெறவுள்ளது.

இந்தக் கூட்டத்தில் பங்கேற்பதற்கு அதிமுக பொதுச்செயலா் எடப்பாடி பழனிசாமிக்கு பாஜக மேலிடம் அழைப்பு விடுத்துள்ளது.

அதேபோல, தமிழகத்திலிருந்து பாமக தலைவா் அன்புமணி ராமதாஸ், தமாகா தலைவா் ஜி.கே.வாசன் ஆகியோருக்கும் அழைப்பு விடுக்கப்பட்டுள்ளது.

ஓபிஎஸ்-ஸுக்கு அழைப்பு இல்லை: அதே நேரம், முன்னாள் முதல்வா் ஓ.பன்னீா்செல்வத்துக்கு அழைப்பு விடுக்கப்படவில்லை. சென்னையில் செவ்வாய்க்கிழமை நடைபெற்ற செய்தியாளா்கள் சந்திப்பில் ஓ.பன்னீா்செல்வம், ‘அழைப்பு எதுவும் வரவில்லை’ என தெரிவித்தாா்.