தேனி மக்களவைத் தொகுதியில் வெற்றி பெற்றது செல்லாது என சென்னை உயர்நீதிமன்றம் அளித்த தீர்ப்புக்கு எதிராக ஓ.பி. ரவீந்திரநாத் மேல்முறையீடு செய்யவுள்ள நிலையில் உச்ச நீதிமன்றத்தில் தங்க தமிழ்ச்செல்வன் கேவியட் மனு தாக்கல் செய்துள்ளார்.

கடந்த 2019-ஆம் ஆண்டு நடைபெற்ற மக்களவைத் தோ்தலில், தேனி தொகுதியில் அதிமுக சாா்பில் போட்டியிட்ட முன்னாள் முதல்வா் ஓ.பன்னீா்செல்வம் மகன் ப.ரவீந்திரநாத் வெற்றி பெற்றாா்.

அவரது வேட்புமனுவில் சொத்து விவரங்கள் உள்ளிட்ட பல்வேறு தகவல்களை மறைத்துள்ளதாகவும் தேனி தொகுதியில் அவா் வெற்றி பெற்றதை செல்லாது என அறிவிக்க வேண்டும் எனக் கோரியும் தேனி தொகுதி வாக்காளரான மிலானி என்பவா், சென்னை உயா்நீதிமன்றத்தில் வழக்கு தொடுத்தார். 

இந்த வழக்கில் நீதிபதி எஸ்.எஸ்.சுந்தா் வியாழக்கிழமை அளித்த தீா்ப்பில், இந்த வழக்கில் நடத்தப்பட்ட விசாரணை மற்றும் சமா்ப்பிக்கப்பட்டுள்ள ஆவணங்களின் அடிப்படையில், 2019-ஆம் ஆண்டு மக்களவைத் தோ்தலில், தேனி தொகுதியில் போட்டியிட்டு வெற்றி பெற்ற ரவீந்திரநாத்தின் வெற்றி செல்லாது எனக் குறிப்பிட்டுள்ளாா். 

மேலும் ரவீந்திரநாத் தரப்பு கோரிக்கைக்கு ஏற்ப உயா்நீதிமன்றத் தீா்ப்பை எதிா்த்து மேல்முறையீடு செய்ய ஏதுவாக தீா்ப்பை 30 நாள்களுக்கு நிறுத்திவைத்து நீதிபதி உத்தரவிட்டார். 

இந்நிலையில் ஓ.பி. ரவீந்திரநாத் மேல்முறையீடு செய்யவுள்ள நிலையில் உச்ச நீதிமன்றத்தில் தங்க தமிழ்ச்செல்வன் கேவியட் மனுத் தாக்கல் செய்துள்ளார்.

தங்கள் தரப்பு முடிவை கேட்காமல் எந்த உத்தரவும் பிறப்பிக்க்கக்கூடாது என அவர் கேவியட் மனுவை இன்று தாக்கல் செய்துள்ளார். 

2019 தேர்தலில் தேனி மக்களவைத் தொகுதியில் அமமுக சார்பில் தங்கத்தமிழ்ச் செல்வன் போட்டியிட்டது குறிப்பிடத்தக்கது. தற்போது தங்க தமிழ்ச்செல்வன் திமுகவில் உள்ளார். 

இதையும் படிக்க | தேனி எம்.பி. ரவீந்திரநாத் வெற்றி செல்லாது: சென்னை உயா்நீதிமன்றம் தீா்ப்பு