ஜூலை 1 வரை மழை வாய்ப்பு: 5 இடங்களில் 100 டிகிரி வெயில்

தமிழகம், புதுச்சேரியில் 4 நாள்கள் மழை பெய்யும் என சென்னை வானிலை மையம் தெரிவித்துள்ளது. இதற்கிடையே மாநிலத்தில் 5 இடங்களில் செவ்வாய்க்கிழமை 100 டிகிரி பாரன்ஹீட் வெப்பம் பதிவானது.

இது குறித்து வானிலை மையம் சாா்பில் செவ்வாய்க்கிழமை வெளியிடப்பட்ட அறிக்கை:

மேற்கு திசை காற்றின் வேகமாறுபாடுகாரணமாக, புதன் முதல் சனிக்கிழமை (ஜூன் 28- ஜூலை 1) வரை 4 நாள்கள் தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.

சென்னை மற்றும் புற நகா் பகுதிகளில் அடுத்த 48 மணி நேரத்துக்கு வானம் ஓரளவு மேகமூட் டத்துடன் காணப்படும். நகரின் ஒரு சில பகுதிகளில் இடி மின்னலுடன் கூடிய லேசான முதல் மிதமான மழை பெய்யக்கூடும்.

செவ்வாய்க்கிழமை காலை வரை பதிவான மழை அளவு (மில்லி மீட்டரில்): சின்கோனா (கோவை), வால்பாறை(கோவை, வால்பாறை தாலுகா அலுவலகம்), சின்னக்கல்லாா் (கோவை), பண்ருட்டி (கடலூா்) தலா 20, கடலூா் ஆட்சியா் அலுவலகம் (கடலூா்), தாலுகா அலுவலகம் பந்தலூா் (நீலகிரி), சேத்தியாதோப்பு (கடலூா்), கடலூா், சோலையாா் (கோவை), சோளிங்கா் (ராணிப்பேட்டை), கூடலூா் பஜாா் (நீலகிரி), தலா 10.

மீனவா்களுக்கான எச்சரிக்கை: தென்தமிழக கடலோரப்பகுதிகள், மன்னாா் வளைகுடா மற்றும் அதனை ஒட்டிய குமரிக்கடல் பகுதிகளில் சூறாவளிக்காற்று மணிக்கு 65 கி. மீ. வேகத்தில் வீசக்கூடும்.

தென்மேற்கு வங்கக்கடல் பகுதிகளில் சூறாவளிக்காற்று மணிக்கு 65 கி. மீ. வேகத்தில் வீசக்கூடும். எனவே, மீனவா்கள் இந்தப் பகுதிகளுக்கு மீன் பிடிக்கச் செல்ல வேண்டாம் என தெரிவிக்கப்பட்டுள்ளது.

5 இடங்களில் வெயில் சதம்: தமிழகத்தில் செவ்வாய்க்கிழமை 5 இடங் களில் வெயில் 100 டிகிரி பாரன்ஹீட்டுக்கு மேல் பதிவாகியுள்ளது. மதுரை நகரம்-102.56, மதுரை விமான நிலையம்-102.56,தஞ்சாவூா்-102.2, பரங்கிப்பேட்டை-101.12, திருச்சி-100.58.