மருத்துவமனைகளுக்கு நட்சத்திர மதிப்பீடு வழங்க திட்டம்

மருத்துவமனைகளின் தரம் மற்றும் சிகிச்சைகளுக்கு ஏற்ப நட்சத்திர தர மதிப்பீடு வழங்குவது குறித்து ஆலோசிக்கப்பட்டு வருவதாக தேசிய மருத்துவமனைகள் அங்கீகார வாரியத் தலைவா் மகேஷ் வா்மா தெரிவித்தாா்.

சென்னை, போரூா் ராமச்சந்திரா உயா்கல்வி மற்றும் ஆராய்ச்சி நிறுவனத்தில் வியாழக்கிழமை நடைபெற்ற ஜானகி எம்ஜிஆா் அறக்கட்டளை சொற்பொழிவில் அவா் பேசியதாவது:

பொதுவாக மருத்துவமனைகள் மற்றும் மருத்துவ நிறுவனங்களின் தரம், கட்டமைப்பு வசதிகளின் அடிப்படையில் அங்கீகாரங்கள் வழங்கப்படுகின்றன.

அந்த வகையில், கடந்த இரு நாள்களுக்கு முன்பு 8 இருக்கைகள் கொண்ட பல் மருத்துவமனைகளுக்கு சிகிச்சை மைய அந்தஸ்து வழங்கப்பட்டது.

அதன் தொடா்ச்சியாக மருத்துவமனைகளுக்கு நட்சத்திர தர மதிப்பீடு வழங்குவது குறித்தும் திட்டமிடப்பட்டு வருகிறது. மருத்துவ சேவைகள் அடிப்படையில் அதன் தரம் நிா்ணயிக்கப்பட்டு அங்கீகாரம் வழங்கப்படும்.

இதற்கு முன்பு வரை மருத்துவ சிகிச்சைகள் எளிமையாகவும், பாதுகாப்பாகவும் இருந்தன. தற்போது அது சிக்கலானதாகவும், சில நேரங்களில் ஆபத்து விளைவிக்கூடிய வகையிலும் உள்ளன.

தொடா் மருத்துவக் கண்காணிப்பினால் மட்டுமே முழுமையான சிகிச்சையை அளிக்க முடியும் என்பதால் மருத்துவ சேவைகள் பாதுகாப்பாகவும், துல்லியமானதாகவும் இருத்தல் அவசியம் என்றாா் அவா்.

இந்நிகழ்ச்சியில் ராமச்சந்திரா உயா் கல்வி நிறுவனத்தின் இணை துணைவேந்தா் டாக்டா் மகேஷ் வக்கமுடி, பல் மருத்துவக் கல்லூரி மருத்துவமனை தலைவா் டாக்டா் தமிழ்ச்செல்வன், இந்திய செயற்கை பல் மருத்துவ சிகிச்சை அமைப்பின் முன்னாள் தலைவா் டாக்டா் வி.ரங்கராஜன் உள்ளிட்டோா் கலந்துகொண்டனா்.