வெள்ளிவிழா - பொன்விழா - பவளவிழா கண்டபோதெல்லாம் ஆட்சியில் இருந்ததைப்போன்று நூற்றாண்டிலும் திமுக ஆட்சியில் இருக்கும் என முதல்வர் மு.க. ஸ்டாலின் தெரிவித்துள்ளார்.

சென்னை அண்ணா அறிவாலயத்தில் திமுக தலைவரும் தமிழக முதல்வருமான மு.க.ஸ்டாலின் தலைமையில் அக்கட்சியின் செயற்குழு கூட்டம் இன்று (டிச. 22) நடைபெற்றது.

இதில், அம்பேத்கரை தரம் தாழ்ந்து அவதூறாக பேசியதற்காக அமித்ஷாவுக்கு கண்டனம், புயல் நிவாரண நிதியை விடுவிக்காததற்கு மத்திய அரசுக்கு கண்டனம் உட்பட 12 தீர்மானங்கள் நிறைவேற்றப்பட்டன.

இந்நிலையில், செயற்குழு கூட்டத்திற்கு பிறகு தனது எக்ஸ் தளப் பக்கத்தில் மு.க. ஸ்டாலின் பதிவிட்டுள்ளதாவது,

வெள்ளிவிழா - பொன்விழா - பவளவிழா கண்டபோதெல்லாம் ஆட்சியில் இருக்கும் நாம் (திமுக) நூற்றாண்டிலும் ஆட்சியில் இருப்போம்; களத்தில் அதற்கான உழைப்பைக் கொடுப்போம்!

இதையும் படிக்க | சொல்லப் போனால்... அதானியில் தொடங்கி அம்பேத்கர் வரை!

75 ஆண்டுகளாக எதிரிகள் எந்த வடிவில் வந்தாலும், அவர்களை அடையாளம் கண்டு வீழ்த்தும் ஆற்றல் கொண்டது திமுக!

செயற்குழுவில் பெற்ற கருத்துகள், வகுத்த வியூகங்களுடன் 2026-ல் நம் கொள்கைக் கூட்டணியின் சாதனை வெற்றிக்குத் தயாராவோம்! வெல்வோம் 200! படைப்போம் வரலாறு என மு.க. ஸ்டாலின் குறிப்பிட்டுள்ளார்.