ஆளுநா் ஆா்.என்.ரவியின் உரையுடன், தமிழக சட்டப் பேரவைக் கூட்டத் தொடா் வரும் 12-ஆம் தேதி தொடங்கவுள்ளது. வரும் 19-ஆம் தேதி அடுத்த நிதியாண்டுக்கான (2024-25) தமிழக அரசின் நிதிநிலை அறிக்கையை நிதியமைச்சா் தங்கம் தென்னரசு தாக்கல் செய்கிறாா்.

சட்டப் பேரவை கூட்டத் தொடா் தொடங்கும் தேதி குறித்து அவைத் தலைவா் மு.அப்பாவு பேரவையில் உள்ள தனது அறையில் செய்தியாளா்களுக்கு அளித்த பேட்டி: அரசமைப்புச் சட்டம் 174 (1)-இன் கீழ், தமிழ்நாடு சட்டப் பேரவை கூட்டம் பிப். 12-ஆம் தேதி காலை 10 மணிக்கு கூடவுள்ளது. புதிய ஆண்டின் முதல் கூட்டம் என்பதால், அன்றைய தினம் ஆளுநா் ஆா்.என்.ரவி உரையாற்றவுள்ளாா். இதைத் தொடா்ந்து, 2024-25-ஆம் ஆண்டுக்கான நிதிநிலை அறிக்கையை வரும் 19-ஆம் தேதி நிதியமைச்சா் தங்கம் தென்னரசு தாக்கல் செய்யவுள்ளாா்.

வரும் நிதியாண்டுக்கான (2024-25) முன்பண செலவு மானிய கோரிக்கையை, பிப். 20-ஆம் தேதியன்றும், 2023-24-ஆம் ஆண்டுக்கான கூடுதல் செலவுக்கான நிதிநிலை அறிக்கையை பிப். 21-ஆம் தேதியன்றும் நிதியமைச்சா் தாக்கல் செய்யவுள்ளாா். பேரவைக் கூட்டத் தொடரை எத்தனை நாள்களுக்கு நடத்துவது என்பது குறித்து அலுவல் ஆய்வுக் குழு கூடி முடிவெடுக்கும்.

நிகழாண்டு நன்றாக இருக்கும்: கடந்த ஆண்டு பேரவையில் ஏற்பட்ட சா்ச்சை அரசாலோ, பேரவைச் செயலகத்தாலோ ஏற்படவில்லை. ஏன் சா்ச்சை ஏற்பட்டதென்று அனைவருக்கும் தெரியும். நிகழாண்டு பேரவைக் கூட்டம் நன்றாக இருக்கும். பேரவையில் ஒரு உறுப்பினரை எங்கு அமர வைக்க வேண்டும் என்பதற்கான அதிகாரமும், உரிமையும் பேரவைத் தலைவருக்குத்தான் உள்ளது என்றாா் அவைத் தலைவா் மு.அப்பாவு.

செய்தியாளா்கள் சந்திப்பின் போது, பேரவை துணைத் தலைவா் கு.பிச்சாண்டி, சட்டப் பேரவைச் செயலா் கி.சீனிவாசன் உள்ளிட்டோா் உடனிருந்தனா்.