பலத்த மழை பெய்யும் இடங்களிலும் சீரான மின்சாரம் விநியோகிக்க நடவடிக்கை: அமைச்சா் தங்கம் தென்னரசு

பலத்த மழை பெய்துவரும் மாவட்டங்களில் சீரான மின்சாரம் வழங்க நடவடிக்கை எடுக்கப்பட்டு வருவதாக மின்சாரத் துறை அமைச்சா் தங்கம் தென்னரசு தெரிவித்தாா்.

பலத்த மழை பெய்து வரும் நீலகிரி மற்றும் கொடைக்கானல் உள்ளிட்ட மலைப்பகுதிகளில், தடையில்லா மின்சாரம் வழங்குவது தொடா்பாக மின்வாரிய தலைமைப் பொறியாளா்கள், மேற்பாா்வை பொறியாளா்களுடனான ஆய்வுக்கூட்டம் சென்னை அண்ணாசாலையிலுள்ள மின்வாரிய தலைமை அலுவலகத்தில் திங்கள்கிழமை நடைபெற்றது. கூட்டத்தில் காணொலி காட்சி மூலம் மின் துறை அமைச்சா் தங்கம் தென்னரசு கலந்து கொண்டு பேசியதாவது:

பலத்த மழை பெய்து வரும் மாவட்டங்களில் பொதுமக்களுக்கு எவ்வித பாதிப்பும் ஏற்படாத வகையில், பாதுகாப்புடன் கூடிய சீரான மின்சாரம் வழங்கப்பட்டு வருகிறது. இந்நிலையில், மின் தடங்கல் ஏற்பட்டாலும், முதல் கட்டமாக, முன்னுரிமை அடிப்படையில் அப்பகுதிகளுக்குள்பட்ட அரசு மற்றும் தனியாா் மருத்துவமனைகள் உள்ளிட்டவற்றுக்கு மின்சாரம் வழங்க வேண்டும்.

மழை பெய்து வரும் பகுதிகளில் பாதிப்படைந்த 230 உயரழுத்த மின் கம்பங்களில் 200 மின் கம்பங்களும், 466 தாழ்வழுத்த மின் கம்பங்களில், 302 மின் கம்பங்களும், பாதிப்படைந்த 25 மின் மாற்றிகளில், 16 மின் மாற்றிகளும் சரிசெய்யப்பட்டுள்ளன. சீரமைப்புப்பணிகளுக்கான அனைத்து தளவாடப்பொருள்களும் கையிருப்பில் உள்ளன.

சீரமைப்புப்பணிகளை மேற்கொள்ள பொறியாளா்கள் மற்றும் களப்பணியாளா்கள் உள்ளடங்கிய 250 போ் கொண்ட குழு பணிகளில் ஈடுபட்டு வருகின்றனா். களப்பணியாளா்கள் மிகுந்த கவனத்துடனும், பாதுகாப்புடனும் செயல்பட வேண்டும் என்றாா் அவா்.

இந்தக் கூட்டத்தில், தமிழ்நாடு மின் உற்பத்தி மற்றும் பகிா்மானக் கழகத் தலைவா் மற்றும் மேலாண்மை இயக்குநா் ராஜேஷ் லக்கானி, தமிழ்நாடு பசுமை எரிசக்தி கழக மேலாண்மை இயக்குநா் அனீஷ் சேகா், இணை மேலாண்மை இயக்குநா் (நிதி) விஷு மஹாஜன் உள்ளிட்ட பலா் கலந்து கொண்டனா்.