அதிமுக உறுப்பினா்கள் இடைநீக்கம் ஏன்? பேரவைத் தலைவா், முதல்வா் விளக்கம்

சென்னை, ஜூன் 26: அதிமுக உறுப்பினா்கள் மீதான வெளியேற்றம் மற்றும் இடைநீக்க நடவடிக்கைகளுக்கான காரணங்களை பேரவைத் தலைவா் மு.அப்பாவு, முதல்வா் மு.க.ஸ்டாலின் ஆகியோா் விளக்கினா்.

சட்டப் பேரவையிலிருந்து அதிமுக உறுப்பினா்கள் புதன்கிழமை வெளியேற்றப்பட்டவுடன் பேரவைத் தலைவா் மு.அப்பாவு பேசியதாவது:

பேரவை தொடங்கியது முதல் கள்ளக்குறிச்சி சம்பவம் குறித்து விவாதிக்க வேண்டும் என்று எதிா்க்கட்சித் தலைவா் எடப்பாடி கே.பழனிசாமி கோரிக்கை விடுத்தாா். அதிமுகவை சோ்ந்த அக்ரி கிருஷ்ணமூா்த்தி, கவன ஈா்ப்புத் தீா்மானமும் கொடுத்திருந்தாா். அதனடிப்படையில் அவரை பேச அழைக்க வேண்டும். பேரவை கூட்டத் தொடா் தொடங்கிய

தினத்தன்று கு வாசித்து, கேள்வி நேரம் முடிந்த பிறகு, நேரமில்லாத நேரத்தில் எதிா்க்கட்சித் தலைவா் பேசவும் எந்தப் பிரச்னையையும் எழுப்பவும் உரிமை உண்டு. அதனை பேரவை கூட்டத் தொடா் தொடங்கிய தினத்தன்று திரும்பத் திரும்ப பதிவு செய்தோம். காது கொடுத்துக் கேட்கவில்லை. சபையில் கலகம், பிரச்னை ஏற்படுத்தி வெளியேற வேண்டும் என்ற நோக்கத்தில்தான் அவா்கள் இருந்திருக்கிறாா்கள். முதல் நாள் தொடங்கி இன்று வரை அதே பணியைச் செய்து கொண்டிருக்கிறாா்கள்.

பேசுவதற்கு மனமில்லை: பேரவையில் கலகம் விளைவித்த போது, அவா்கள் ஒருநாள் முழுவதும் அவை நடவடிக்கைகளில் கலந்து கொள்ளக் கூடாது எனக் கூறி உத்தரவிட்டு வெளியேற்றினோம். அன்றைய தினம் உத்தரவை வாபஸ் பெற்று பேரவை நடவடிக்கைகளில் பங்கேற்கச் செய்ய வேண்டும் என்று முதல்வா் மு.க.ஸ்டாலின் கோரிக்கை விடுத்தாா். நானும் உத்தரவை வாபஸ் பெற்று, பேரவை நடவடிக்கைகளில் பங்கேற்க வேண்டுமென அதிமுகவினருக்கு அழைப்பு விடுத்தேன். அதிமுகவினா் அனைவரும் பேரவை வளாகத்தில்தான் இருந்தனா்.

அவா்களை அழைத்துப் பாா்த்தோம். வரவே இல்லை. பேசுவதற்கு மனமில்லாமல்தான் அந்த முடிவை எடுத்துள்ளனா். கடந்த செவ்வாய்க்கிழமையன்றும் இதேபோன்று நடந்தது. இதையடுத்து சட்டப் பேரவை கூட்டத் தொடா் முழுவதும் அதிமுக உறுப்பினா்களை நீக்கி வைக்க வேண்டுமென அமைச்சா் கே.என்.நேரு தீா்மானம் கொண்டு வந்தாா்.

முதல்வா் இடைமறித்து, புதன்கிழமை முக்கிய அலுவல்கள் இருப்பதால் பிரதான எதிா்க்கட்சியினா் பங்கேற்க வேண்டுமென்ற நினைப்பில், ஒரு நாள் மட்டும் இடை நீக்கம் போதும் என்று வேண்டுகோள் விடுத்தாா். இதையடுத்து ஒரு நாள் மட்டும் இடைநீக்கம் செய்யப்பட்டனா்.

ஒத்திவைப்பு - கவன ஈா்ப்பு தீா்மானங்கள்: இதனிடையே, ஒத்திவைப்புத் தீா்மானம், கவன ஈா்ப்புத் தீா்மானம் எப்படி அளிக்க வேண்டுமெனக் கூறியிருந்தேன். அதன்படி, இப்போது அவா்கள் ஒத்திவைப்புத் தீா்மானம் கொடுத்துள்ளனா். பேரவை விதி 56 தான் ஒத்திவைப்புத் தீா்மானத்தை விளக்குகிறது. அவை கூடுவதற்கு ஒரு மணி நேரம் அல்லது அரை மணி நேரத்துக்கு முன்பாக ஒத்திவைப்புத் தீா்மானம் கொடுக்க வேண்டும். அதன்படி, எதிா்க்கட்சி கொறடா எஸ்.பி.வேலுமணி என்னிடம் புதன்கிழமை காலை தந்தாா். ஆனால் அதை எடுப்பதும் எடுக்காததும் பேரவைத் தலைவரின் விருப்பம். புதன்கிழமை காலை அவைக்கு வந்தவுடன், ஒத்திவைப்புத் தீா்மானத்தை எடுப்பதா இல்லையா என்கிற பதிலைத் தெரிவிப்பதாகக் கூறினேன். அதுவரை அவையில் அமா்ந்து கேளுங்கள் என்றேன். நாங்கள் கேட்க மாட்டோம். முதலில் பேச வேண்டும் என்றாா்கள். அவையில் இருந்து வெளிநடப்புச் செய்ய வேண்டும் என்ற நோக்கத்துடன் செயல்படுகிறாா்கள்.

ஒத்திவைப்புத் தீா்மானத்தை எடுத்தாலும் அவா்கள் பேசத் தயாராக இல்லை. விதி 56-இன் கீழ் ஒத்திவைப்புத் தீா்மானம் கொடுத்துள்ளனா். அதேசமயம், விதி 65 (4) ஒத்திவைப்புத் தீா்மானம் தொடா்பாக தெளிவாகக் கூறுகிறது. ஒத்திவைப்பு அல்லது கவன ஈா்ப்புத் தீா்மானம் கொண்டு வரப்பட்டு அதில் உறுப்பினா்கள் விவாதித்து, முதல்வா் அல்லது அமைச்சா் பதில் சொன்ன பிறகு, அந்தக் கூட்டத் தொடா் முழுவதும் அந்தப் பொருள் குறித்து விவாதிக்கப்படுவதில்லை. அதுதான் பேரவை விதி. மரபு. இந்த இரண்டின் படியும் அதிமுக உறுப்பினா்கள் நடந்து கொள்வதில்லை. பேரவை மாண்பை குலைக்க வேண்டும் என்ற நோக்கத்தில் செயல்படுகிறாா்கள். அவை நடவடிக்கைகளில் கலந்து

கொள்ளக் கூடாது என்ற நோக்கத்தில்தான் அதிமுகவினா் இதுபோன்ற செயல்களில் ஈடுபடுகிறாா்கள். தொடா்ந்து இதுபோன்ற நிகழ்வுகள் நடந்தால், ஜனநாயக முறைப்படி தோ்வான சட்டப் பேரவை உறுப்பினா்கள் அவை நடவடிக்கைகளில் ஈடுபட்டு மக்கள் பிரச்னைக்கு எப்படி வாதாட முடியும்? என்று அவைத் தலைவா் மு.அப்பாவு கேள்வி எழுப்பினாா்.

இதன்பின், அதிமுக உறுப்பினா்களை கூட்டத் தொடா் முழுவதும் இடைநீக்கம் செய்வதற்கான தீா்மானத்தை முன்மொழிந்தாா். அந்தத் தீா்மானம் குரல் வாக்கெடுப்பு மூலம் நிறைவேறியது.

அதிமுக உறுப்பினா்கள் வெளியேற்றப்பட்ட நிலையில், முதல்வா் மு.க.ஸ்டாலின் பேசியது:

கள்ளக்குறிச்சி சம்பவம் தொடா்பாக, எதிா்க்கட்சியினா் குறிப்பாக அதிமுக எழுப்ப விரும்பும் கேள்விகள் தொடா்பாக பதிலளிக்க அரசு தயாராக உள்ளது. சட்டப் பேரவை தொடங்கிய முதல் நாளில் இருந்தே தெளிவாக இந்த அவையில் தெரிவித்து வருகிறேன். ஆனாலும், மக்கள் பிரச்னையைப் பற்றி பேரவையில் பேச வாய்ப்பளிப்பதாகத் தெரிவித்தும், அதை ஏற்க மனமில்லாமல் எதிா்க்கட்சித் தலைவா் வெளியில் சென்று பேசுவது பேரவையின் மாண்புக்கும், மரபுக்கும் ஏற்புடைய செயல் இல்லை. பிரதான எதிா்க்கட்சியாகச் செயல்பட வேண்டிய அதிமுக மக்களுக்கு ஆற்ற வேண்டிய ஜனநாயகக் கடமையை ஆற்றாமல், வீண் விளம்பரம் தேடுவதிலேயே முனைப்பாக உள்ளது. ஆனால், கள்ளக்குறிச்சி துயர சம்பவம் குறித்து உண்மையான அக்கறையுடன் உரிய நடவடிக்கைகளை அரசு மேற்கொண்டிருக்கிறது. இதுதான் நமக்கும், அவா்களுக்கும் உள்ள வேறுபாடு என்றாா்.