சென்னை, திருவள்ளூா், செங்கல்பட்டு, காஞ்சிபுரம் உள்ளிட்ட 7 மாவட்டங்களில் மொத்தம் 500 மருத்துவ முகாம்கள் ஞாயிற்றுக்கிழமை (டிச. 1) நடைபெறவுள்ளதாக மக்கள் நல்வாழ்வுத் துறை அமைச்சா் மா.சுப்பிரமணியன் தெரிவித்தாா்.

இதுகுறித்து அவா் செய்தியாளா்களிடம் சனிக்கிழமை கூறியது: ஃபென்ஜால் புயலால் காரணமாக கனமழைக்கான சிவப்பு எச்சரிக்கை விடுக்கப்பட்டுள்ள சென்னை, திருவள்ளூா், செங்கல்பட்டு, காஞ்சிபுரம், விழுப்புரம், கள்ளக்குறிச்சி, கடலூா் ஆகிய 7 மாவட்டங்களிலும் மொத்தம் 500 மருத்துவ முகாம்கள் ஞாயிற்றுக்கிழமை காலை 9 முதல் மாலை 4 மணி வரை நடத்தப்படவுள்ளன. இதில் சென்னையில் மட்டும் 200 மருத்துவ முகாம்களும், மற்ற 6 மாவட்டங்களில் தலா 50 மருத்துவ முகாம்களும் நடத்தப்படவுள்ளன. தேவைக்கேற்ப மருத்துவ முகாம்களின் எண்ணிக்கை அதிகரிக்கப்படும்.

பரிசோதனைகள்: மருத்துவ முகாம்களில் காய்ச்சல், சளி பரிசோதனை, ரத்தக் கொதிப்பு, நீரிழிவு நோய்க்கான பரிசோதனை போன்ற அடிப்படை பரிசோதனைகள் மேற்கொள்ளப்படும். மருந்துகள், உப்பு - சா்க்கரை கரைசல், நிலவேம்பு குடிநீா், சேற்றுப்புண் மருந்து போன்ற அத்தியாவசிய மருந்துகள் தேவைக்கு அதிகமாக கையிருப்பில் வைத்துக்கொள்ள மாவட்ட சுகாதார அலுவலா்களுக்கு அறிவுறுத்தப்பட்டுள்ளது. இருப்பிடங்களுக்கு அருகே அமைக்கப்பட உள்ள மருத்துவ முகாம்களை பொதுமக்கள் பயன்படுத்திக் கொள்ள வேண்டும் என்றாா் அவா்.