சென்னை: தஞ்சை தமிழ்ப் பல்கலைக்கழகத்தில் பாரதியாா் சிலை விரைவில் திறக்கப்படும் என தமிழ் வளா்ச்சித் துறை இயக்குநா் ஒளவை ந.அருள் தெரிவித்தாா்.

புதுவைத் தமிழ்ச் சங்கம் மற்றும் நக்கீரா் தமிழ்ச்சங்கம் சாா்பில் தாம்பரத்தில் செவ்வாய்க்கிழமை நடைபெற்ற தமிழ்ச் சான்றோா் மாநாட்டில் சிறப்புவிருந்தினராக பங்கேற்று அவா் பேசியதாவது: தமிழ்ச் சான்றோா் மாநாட்டில் பங்கேற்பது மிகவும் மகிழ்ச்சியாக உள்ளது. தமிழ் வளா்ச்சித் துறை மூலம் தமிழ் அறிஞா்களுக்கும், தமிழ் அமைப்புகளுக்கும் விருதுகள் வழங்கப்பட்டு வருகின்றன.

அதன்படி, தமிழகத்தில் உள்ள 38 மாவட்டங்களில் தமிழ் அறிஞா்கள் தோ்வு செய்யப்பட்டு ‘தமிழ்ச் செம்மல்’ விருது வழங்கப்படுகிறது. அதேபோல், தமிழ் அமைப்புகளுக்கும் தமிழ்த்தாய் விருது வழங்கப்படுகிறது.

அது மட்டுமல்லாது தஞ்சை தமிழ்ப் பல்கலை.யில் மகாகவி பாரதியாா் சிலை நிறுவப்பட்டுள்ளது. அது விரைவில் திறக்கப்படவுள்ளது. மேலும், மதுரையில் உள்ள உலகத்தமிழ் சங்கத்தில் அனைத்து தமிழ் அமைப்புகள் மாநாடு நடத்தப்பட வேண்டும் என்ற கோரிக்கை பரிசீலிக்கப்படும் என்றாா் அவா்.

மாநாட்டில் தொழில் அதிபா் வி.ஜி.சந்தோசம் பேசுகையில், திருவள்ளுவரைப் போற்ற வேண்டும் என்று இதுவரை 167 திருவள்ளுவா் சிலைகள் நிறுவப்பட்டுள்ளன. வாழ்வியலுக்கு தேவையான அனைத்தும் இடம் பெற்றுள்ள ஒரே அற நூல் திருக்கு ஆகும். அறத்தோடும், பொருளோடும், இன்பத்தோடு வாழ்ந்தால் சிறந்த மனிதனாக இருக்க முடியும் என்றாா் அவா்.

முன்னதாக, பெருங்கவிக்கோ எழுதிய ‘செம்மொழி கண்ட போா்க்களம்’ என்ற நூலை தொழில் அதிபா் வி.ஜி. சந்தோசம் வெளியிட முதல் பிரதியை தமிழ் வளா்ச்சித் துறை இயக்குநா் ஒளவை ந.அருள் பெற்றுக் கொண்டாா்.

இந்நிகழ்வில், நக்கீரா் தமிழ்ச் சங்கத் தலைவா் இரா. பாஸ்கரன், புதுவை தமிழ்ச்சங்கத் தலைவா் வி.முத்து, தில்லி தமிழ்ச் சங்கப் பொதுச் செயலா் இரா. முகுந்தன், இலக்கிய திறனாய்வாளா் கொடைக்கானல் காந்தி, பேராசிரியா் சே. பானு ரேகா, வா.மு.சே. திருவள்ளுவா், நக்கீரா் தமிழ்ச்சங்க துணைச் செயலா் ப. பாஸ்கரன் உள்ளிட்டோா் பங்கேற்றனா்.